عه‌فرین بووه‌ته‌ گۆڕه‌پانی تۆڵه‌ سه‌ندنه‌وه‌ی تورکیا

ئه‌مین حه‌تیت شاره‌زای سیاسی و سه‌ربازیی لوبنان ئاماژه‌ی دا که‌ تورکیا هه‌موو تۆڵه‌کانی خۆی له‌ کورد خه‌ریکه‌ به‌ هێرش کردن بۆ سه‌ر عه‌فرین ده‌کاته‌وه‌ و ده‌یه‌وێت شکسته‌کانی پێشووی خۆی دابپۆشێت.

ئاژانسی مێهر، به‌شی نێونه‌ته‌وه‌یی - ڕامین حسه‌ین ئابادی: ماوه‌ی چه‌ندی ڕۆژێکه‌ که‌ سوپای تورکیا هێرشی داگیرکاری خۆیی بۆ سه‌ر شاری عه‌فرین له‌ سووریا ده‌ست پێ کردووه‌ و ڕایگه‌یاندووه‌ که‌ له‌ دوای ئه‌وه‌یه‌ تاکوو هێزه‌ کوردییه‌کانی سه‌ر به‌ یه‌په‌گه‌ له‌م ناوچه‌یه‌ ده‌ر بکات. بۆ ئه‌م مه‌به‌سته‌ش سوپای تورکیا به‌ هاوکاری ئۆپۆزیسیۆنی چه‌کداری سووریا هێرشیان کردووه‌ته‌ سه‌ر شاری عه‌فرین.

هه‌ر له‌مباره‌وه‌ له‌گه‌ڵ ئه‌مین حه‌تیت، شاره‌زای سیاسی و سه‌ربازی لوبنان قسه‌مان کردووه‌ که‌ پێشکه‌ش ده‌کرێت:

* تورکیا هێرشی کردووه‌ته‌ سه‌ر عه‌فرین ڕا و بۆچوونی ئێوه‌ له‌ سه‌ر ئه‌م بابه‌ته‌ چییه‌؟

ئێسته‌ تورکیا له‌ دوای قەرەبووکردنه‌وه‌ی هه‌موو شكسته‌کانی خۆی له‌ سووریا و ناوچه‌که‌یه‌ که‌ له‌م چه‌ند ساڵه‌دا بەسەریدا سەپاوە. تورکیا له‌ ساڵانی ڕابردوودا به‌ هاوکاری تیرۆریسته‌کان وه‌ک داعش، نه‌یتوانی به‌ ئامانجه‌کانی خۆی بگات و ئێسته‌ش ده‌یه‌وێت ئه‌م شکسته‌ گه‌وره‌یه‌ به‌ داگیر کردنی عه‌فرین قەرەبوو بکاته‌وه‌. له‌ ڕاستیدا تورکیا هه‌موو تۆڵه‌کانی خۆی له‌ کورد خه‌ریکه‌ به‌ هێرش کردن بۆ سه‌ر عه‌فرین ده‌کاته‌وه‌ و ده‌یه‌وێت شکسته‌کانی پێشووی خۆی دابپۆشێت.

* تورکیا پاگه‌نده‌ ده‌کات که‌ به‌ مه‌به‌ستی دابین کردنی ئاشتی و سه‌قامگیری هێرشی کردووه‌ته‌ سه‌ر عه‌فرین ئایا شتی وه‌ها ڕاسته‌ و له‌م ناوچه‌یه‌ ئاسایش و سه‌قامگیری بوونی نه‌بوو؟

هه‌وڵ بۆ شه‌ڕی دژ به‌ تیرۆریسته‌کان له‌ باکووری سووریا له‌ لایه‌ن تورکیاوه‌ درۆیه‌کی گه‌وره‌یه‌ که‌ ئێسته‌ هه‌موو جیهان لێی ئاگاداره‌. چۆن تورکیا ئێسته‌ ئه‌م دروشمه‌ ده‌دات به‌ڵام کاتێک که‌ سووریا پڕ بوو له‌ داعشییه‌کان و تیرۆریسته‌کانی ئه‌لقاعیده‌ ئاماده‌ نه‌بوون هیچ هه‌نگاوێک بۆ سه‌قامگیری سووریا هه‌ڵبگرێت. ئه‌مه‌ دروشم و بیانۆیه‌ک زیاتر نییه‌ و ته‌نیا بۆ مه‌به‌ستی داگیرکاری ئه‌نجام ده‌بێت.

* ئه‌مریکا ده‌یه‌وێت هێزێکی ۳۰ هه‌زار که‌سی به‌ به‌شداری کورده‌کان دروست بکات، مه‌به‌ست له‌م کاره‌ی ئه‌مریکا چییه‌؟

له‌ ئێستادا ئه‌مریکا دوو ئامانجی سه‌ره‌کی له‌ سووریا هه‌یه‌. یه‌که‌م له‌ سووریا بۆ هه‌میشه‌ بـمێنێته‌وه‌. له‌ ڕاستیدا ئه‌مریکا له‌ دوای ئه‌وه‌یه‌ که‌ ڕێگایه‌ک بدۆزێته‌وه‌ که‌ بۆ هه‌میشه‌ له‌ سووریا بوونی سه‌ربازی هه‌بێت. ئێسته‌ باشترین دۆخه‌ بۆ ئه‌وه‌ی به‌م ئامانجه‌ بگات و ناشیه‌وێت ئه‌م ده‌رفه‌ته‌ له‌ کیسی خۆی بدات. دروست کردنی هێزی سه‌ربازی ده‌توانێت ئه‌م ئامانجه‌ی ئه‌مریکا مسۆگەر بکات.

دووهه‌م ئه‌وه‌ی که‌ ئه‌مریکا دۆخی ئێستای سووریا به‌ باشترین شت ده‌زانێت بۆ ئه‌وه‌ی له‌ ئاستی کاریگه‌ری ئێران له‌ سووریا که‌م بکاته‌وه‌ هه‌ر بۆیه‌ له‌م ئامانجه‌ به‌ ئاسانی ده‌ست ناکێشێته‌وه‌. ئێسته‌ به‌ باشترین کات ده‌زانێت که‌ کاریگه‌ری ئێران له‌ سووریا که‌م بکاته‌وه‌. ئه‌مه‌ش دوو ئامانجی سه‌ره‌کی ئه‌مریکایه‌ له‌ دروست کردنی هێزێکی نوێ سه‌ربازی له‌ باکووری سووریا.

* بڕیار وایه‌ له‌ سوچی کۆنگره‌یه‌کی نوێ بۆ ئاشتەوایی نیشتمانی سووریا به‌ ڕێوه‌ بچێت، داهاتووی ئه‌م دانوستانه‌ به‌ هۆی دوژمنکاری تورکیا و ئه‌مریکا چۆن ده‌بینن؟

ئه‌مه‌ له‌ به‌رچاو بگرن که‌ سوپای سووریا به‌ هاوکاری ئێران و ڕووسیا و به‌ره‌ی بەرخۆدان سه‌رکه‌وتنی مه‌یدانی زۆری به‌ ده‌ست هێناوه‌ که‌ کاریگه‌ری ڕاسته‌وخۆی له‌ پڕۆسه‌ی ئاشتی سووریا له‌ داهاتوودا ده‌بێت. له‌ ڕاستیدا پڕۆسه‌ی ئاشتی سووریا په‌یوه‌ندی زۆری به‌ سه‌رکه‌وتنه‌ مه‌یدانییه‌کان له‌م وڵاته‌ هه‌یه‌ و ئه‌مه‌ش له‌ ئێستادا زیاتر له‌ سوودی دیمەشق و هاوپه‌یمانه‌کانییه‌تی.

ڕاسته‌ که‌ دوژمنکاری تورکیا و ئه‌مریکا له‌ باکووری سووریا درێژه‌ی هه‌یه‌، به‌ڵام گۆڕانکارییه‌ مه‌یدانییه‌کان زیاترین کاریگه‌ریان به‌ سه‌ر پڕۆسه‌ی ئاشتی سووریا له‌ داهاتوودا ده‌بێت.

News Code 16379

نیشانەکان

بۆچوونی ئێوە

You are replying to: .
  • 2 + 14 =