دوایین زانیارییەکان له‌سه‌ر ئۆپراسیۆنی عه‌فرین

له‌ حاڵێکدا که‌ سووریا توانی سه‌رکه‌وتنی باش به‌رانبه‌ر به‌ گرووپه‌ تیرۆریسته‌کان له‌م وڵاته‌ وه‌ده‌ست بێنێت، ئه‌ردۆغان جارێکی دیکه‌ به‌ هێرش کردنه‌ سه‌ر کورده‌کانی سووریا له‌ هه‌وڵی ئه‌وه‌دایه‌ که‌ ناوچه‌که‌ تووشی قه‌یران بکاته‌وه‌.

به‌ ڕاپۆرتی ئاژانسی هه‌واڵی مێهر،  لە ڕۆژی یەكشەممه‌ ۱ی ڕێبه‌ندانه‌وه‌ سوپای توركیا لە ئاسمان و زەوییەوە هێرش و پەلامارەکانى بۆ سەر شاری عەفرین دەستپێكردووە و بەهۆیه‌وە ژمارەیەک هاوڵاتى کوردی سووریا بوونه‌ته‌ قوربانی له‌شکه‌رکێشیه‌ سیاسی و سه‌ربازیه‌که‌ی ئه‌ردۆغان.

سوپاى تورکیا لە دواى ٩ ڕۆژ لە تۆپبارانکردنى سنوورەکانى شەهبا و عەفرین لە  کوردستانی سووریا دوێنێ هێرشى ئاسمانی  بە ٧٢ فڕۆکە بۆ سەر ١٠٨ شوێن لەو هەرێمەدا دەستپێکرد و تا ئێستا بەردەوامیى هەیە.

بەهۆى ئەو شەڕانەوە، لە ناوچەى بلبلێ تانکێکى سوپاى تورکیا و هەروەها لە ناوچەى شەرا ٢ تانکى ترى سوپاى تورکیا تەقێنراونەتەو، کە ڤیدیۆى تەقاندنەوەى یەکێک لەو تانکە بڵاوکراوەتەوە.

هەروەها بەهۆى بۆردومانى فڕۆکە جەنگییەکانى تورکیاوە بۆ سەر گوندی جلبەر لە ناوچەى شێراوا ٧ ئەندامى خێزانێک شەهیدبوون، کە لەلایەن تیمى فریاگوزاریى مانگى سورى کوردەوە، لەژێر دار و پەردوى خانوەکەیاندا دەرهێنراون.

ئەمە لە حاڵێکدایە کە ستێفان دۆگاریک، وته‌بێژی ئه‌مینداری گشتی نه‌ته‌وه‌ یه‌کگرتووه‌کان وتی: له‌ کاتی ده‌ست پێ کردنی ئۆپراسیۆنی سه‌ربازی تورکیا له‌ ناوچه‌ی عه‌فرین زیاتر له‌ ۱۲۶ هه‌زار که‌سی سڤیل ئاواره‌ بوون و ۳۰۰ هه‌زار که‌سی دیکه‌ش مه‌ترسی ئاواره‌ بوون له‌ سه‌ریانه‌.

لە دوایین هەواڵەکاندا ئەمڕۆ چاودێریی مافی مرۆڤی سووریا کە ناوەندکەی لە لەندەنە، ڕایگەیاند: لە درێژەی هێرشی سەربازیی تورکیا بۆ سەر ناوچەی عەفرین و باکووری سووریا، لانی کەم ٢٤ کەسی سڤیل و ٢٦ هێزی کورد کوژراون.

هەروەها لە پێکدادانەکاندا لانی کەم ١٩ کەس لە هێزەکانی سەر بە گرووپه‌ پاڵپشتکراوه‌کانی ئەنقەرە کۆژراون و ٩ تەرمیش تا ئێستا بە نەناسراوەیی ماونەتەوە.

لەشکرکێشی سوپای تورکیا بۆ سەر شاری عەفرین کە لەژێر ناوی "چڵی زەیتوون" به‌ مووشه‌ک باران  و شه‌ڕی وشکانی دەستیپێکردووە، تائێستا هیچ ئەنجامێکی ئەوتۆی نەبووە چونکوو عه‌فرین و باکووری سووریا ناوچه‌یه‌کی ته‌پۆڵکه‌ییه‌ و  شەڕڤانانی کوردی سه‌ر به‌ پارتی یه‌کێتی دیمۆکراتیک و سوپای دیمۆکراتیکی سووریا شاره‌زایی باشین له‌ ناوچه‌که‌ و شه‌ڕی پارتیزانی هه‌یه‌ و بەرگریی سەخت لە شارەکە دەکەن.

له‌ چه‌ند کاتژمێر دوای ده‌ستپێکی مووشه‌ک بارانی عه‌فرین له‌ لایه‌ن سوپای ئه‌ردۆغان و ره‌وانه‌ کردنی هیزی وشکانی بۆ ناو خاکی سووریا، جەیمس ماتیس وەزیری بەرگری ئه‌مریکا ئاشکرای کرد که‌ پێنتاگۆن و کۆشکی سپی پێشتر ئاگاداری ئه‌م په‌لاماره‌ی تورکیا بۆ سه‌ر خاکی سووریا بوونه.

هاوکات وه‌زیری ده‌ره‌وه‌ی ئه‌مریکا له‌مباره‌وه‌ ڕایگه‌یاند: تورکیا مافی خۆیه‌تی له‌ خاکی خۆیی و شارۆمه‌نده‌کانی به‌رگری بکات و ئێمه‌ش پشتیوانی ده‌که‌ین.

ئه‌مریکا له‌م سێ ڕۆژه‌دا ته‌نیا داوای له‌ تورکیا کردووه‌ بە شێوەیەک ئه‌و په‌لاماره‌ی ئەنجام بدات که‌ زیانی گیانی بۆ هاووڵاتیانی مەدەنی نەبێت و کاتەکەشی سنووردار بێت واتا‌ به‌ جۆرێک گڵۆپی سه‌وزی بۆ ئه‌ردۆغان هه‌ڵکردووه‌ که‌ هێرش بکاته‌ سه‌ر باکووری سوریا و بگاته‌ ئامانجه‌کانی خۆی و ته‌نیا کاری به‌ به‌رژه‌وه‌ندییه‌کانی ئه‌مریکا له‌ سووریا نه‌بێت و بەم جۆرەش کوردی سووریا زیاتر خۆی بە بەندیواری ئەمریکا دەزانێت و ئەمریکا پێی نیشان دەدات کە هێزی بەرەنگاریی لەگەڵ زلهێزانی ناوچەکەی نییە و بۆ هەمیشە کوردی سووریا پیویستی بە ئەمریکایە .

ڕه‌نگه‌ له‌ شرۆڤه‌ی ئه‌م هه‌ڵوێست گرتنه‌ی ئه‌مریکا به‌رانبه‌ر به‌ ئۆپراسیۆنی عه‌فرین ده‌ر بکه‌وێت که‌ بۆچی ئه‌مریکا هیچ کات هاوپه‌یمانێکی متمانه‌ پێکراو نه‌بووه‌ بۆ کورد. له‌ لایه‌که‌وه‌ ئه‌مریکا به‌ ناردنی جیهازاتی سه‌ربازی و چه‌ک و چۆڵ بۆ سه‌ڕڤانانی کورد ده‌ڵێت یارمه‌تی کوردی سووریا ده‌ده‌ین که‌ به‌رگری له‌ خۆی و خاکه‌که‌ی بکات به‌رانبه‌ر به‌ تیرۆریستان و په‌لامارده‌ران و سوپایه‌کی ۳۰ هه‌زار که‌سی ڕێکده‌خه‌ین له‌ هێزه‌کانی سوریای دیمۆکراتیک که‌ زۆربه‌ی ئه‌ندامانیان شه‌ڕڤانی کوردن و به‌ چه‌کی پێشکه‌وتوو ته‌یاریان ده‌که‌ین. به‌ڵام ئێستا که‌ تورکیای هاوپه‌یمانی ئه‌مریکا به‌ ئاشکرای په‌لاماری کوردی سووریا ده‌دات، کۆشکی سپی بێده‌نگی ڕاگرتووه‌ و ته‌نیا داوا ده‌کات کاتی ئۆپراسیۆنه‌که‌ زۆر نه‌بێت.

 لە سەرەتای ئەمساڵی زایینیەوە تاقمێک لە زانایان، فیلسوفان و چالاکانی مافی مرۆڤی کە ناوی نوام چامسکی، مایکڵ واڵزێر و مایکڵ هارت لە نێویاندا بەرچاو بوو، نامەیەکیان سەبارەت بە وەدی هاتنی هەڕەشەی هێرشی تورکیا بۆ سەر عەفرینی سووریا بڵاو کردەوە.

لەو نامەیەدا داوا لە ئێران، ڕووسیا و ئەمریکا کراوە کە بە پێشگری لەو دەستدرێژییە سەربازییەی تورکیا لە ناوچە کوردنشینەکانی سووریا، پێش بە دووپاتەبوونەوەی کارەساتی کۆبانی بگرن.

ئه‌گه‌رچی زۆربه‌ی وڵاتان و لایه‌نه‌ سیاسییه‌کانی ناوچه‌که‌ و جیهان داوایان کردووه‌ که‌ تورکیا هێرشه‌که‌ی ڕابگرێت به‌ڵام  سوپای ئه‌ردۆغان به‌رده‌وامه‌ له‌ هێرشه‌که‌ی و ته‌نانه‌ت نه‌ته‌وه‌ یه‌کگرتووه‌کانیش نه‌یتوانی به‌ر به‌ ئۆپراسیۆنی عه‌فرین بگرێت و کۆبوونه‌وه‌ی دوێنێ ئه‌نجومه‌نی ئاسایشی نه‌ته‌وه‌یه‌کگرتووه‌کان سه‌باره‌ت به‌م پرسه‌ بێ ئه‌نجام کۆتایی هات.

هەندێ وڵاتی ناوچەکە لەوانە کۆماری ئیسلامی ئێران، عێراق، خودی دەوڵەتی سووریا، ئەڵمانیاو ... داوایان لە تورکیا کردووە ئەم هێرشانە بوەستێنێت و حزب و پارتە سیاسیەکانی ناوچەکە لەوانە هەدەپە، پەیەدە، گۆڕان و ژمارەیەک حزب و لایەنی سیاسی کوردی عێراق و تورکیاش ئیدانەی ئەو هێرشانەیان کردووە.

ئەمڕۆ کارگێری مەکتەب سیاسی یەکێتی نیشتیمانیی کوردستان لە ئامادەیی هێزەکانی پێشمەرگەی هەرێم بۆ چوونە ناو سووریا و بەرەنگاریی سوپای تورکیا هەواڵی دا.

مەلا بەختیار  وتی: هێزەکانی پێشمەرگە ئامادەن یارمەتی کوردەکانی سووریا بدەن لە بەرەڤانی پیرۆز بۆ ڕووبەڕوو بوونەوەی تورکیا و سوپای ئازادی سووریا.

لە کۆتاییدا پێش بینی ئەوە دەکرێت لەبەر ئەوەی کە کوردی سووریا سەرەکی ترین هاوپەیمانی ئەمریکایە لەم وڵاتەدا و کۆشکی سپی بۆ پلانەکانی داهاتووی لە ناوچەکە پێویستی پێیە تی؛ ڕێگە نادات تورکیا ئەم هاوپەیمانەی بتارێنێت و لە درێژ ماوەدا ناهێڵێت کە زەبر لە بەرژەوەندییەکانی ئەمریکا بدات.   ڕووسیاش هەر بەو چەشنە رێگە نادات تورکیا جەولانی زۆر لە باکووری سووریا بدات و ئەم چاۆپۆشیەشی بۆ ئەوەیە کە لە بەهێزیی ئەمریکا لە ناو کوردی سووریا کەم بکاتەوە.کەواتە رەنگە ئۆپراسیۆنی عەفرین ماوەیەکی زۆر نەخایەنێت و ته‌نیا هێز نواندنێکی ناوچه‌یی و سیاسی بۆ ئه‌ردۆغان بێت.

News Code 16314

نیشانەکان

بۆچوونی ئێوە

You are replying to: .
  • 1 + 13 =