پاریس دژی ڕاگه‌یه‌ندراوه‌که‌ی ترامپه‌ سه‌باره‌ت به‌ قودس

سه‌رۆک کۆماری فه‌ڕه‌نسا له‌ میانه‌ی کۆنفڕانسێكی مێدیایی له‌گه‌ڵ سه‌رۆک وه‌زیرانی ئیسڕائیل ڕایگه‌یاند که‌ پاریس دژی بڕیاره‌که‌ی دۆناڵد ترامپه‌ سه‌باره‌ت به‌ قودس.

به‌ ڕاپۆرتی ئاژانسی مێهر، ئێمانۆئل ماکرۆن، سه‌رۆک کۆماری فه‌ڕه‌نسا له‌ میانه‌ی کۆنفڕانسێکی هاوبه‌ش له‌گه‌ڵ بێنیامین نتانیاهۆ، سه‌رۆک وه‌زیرانی ڕژیمی زایۆنی وتی: هیڕشه‌کانی ۲ ڕۆژی پێشووی ئیسڕائیل ئیدانه‌ ده‌که‌ین، من به‌ نێتانیاهۆم ڕاگه‌یاند که‌ فه‌رمانه‌که‌ی ترامپ دژی یاسا نێونه‌ته‌وه‌ییه‌کانه‌ و مه‌ترسییه‌ بۆ سه‌ر ئاشتی.

ئه‌و زیادی کرد: فه‌ڕه‌نسا پێبه‌نده‌ به‌ ئه‌منیه‌تی ئیسڕائیل، به‌ڵام کێشه‌ی نێوان فه‌له‌ستین و ئیسڕائیل به‌ دانوستان چاره‌سه‌ر ده‌کرێت. ساڵی ۲۰۱۸ سه‌ردانی فه‌له‌ستین ده‌که‌م.

نتانیاهۆش له‌م کۆنفڕانسه‌دا وتی: ماکرۆن ئێوه‌ دۆستی ئێمه‌ن له‌وه‌ی که‌ تیرۆریسم له‌ دژی ئێمه‌ ئیدانه‌ ده‌که‌ن سپاستان ده‌که‌ین. ئێمه‌ له‌ ڕووی ئه‌منی و ئابوورییه‌وه‌ به‌رده‌وام هاوکاری ئه‌ورووپامان کردووه‌.

ئه‌و زیادی کرد: به‌ڵام ئێمه‌ پێویستمان به‌وه‌یه‌ هه‌رچی زووتره‌ بگوازینه‌وه‌ بۆ ئۆرشه‌لیم و هه‌رچی زووتر ئه‌م شاره‌ به‌ پایته‌ختی ئیسڕائیل بناسرێت زووتر ئاشتی له‌ ناوچه‌که‌ سه‌ر ده‌گرێت. ئێمه‌ هیچ هه‌ڕه‌شه‌یه‌ک له‌ دژی ئیسڕائیل قبوڵ ناکه‌ین. زۆربه‌ی وڵاتانی عه‌ره‌بی قبوڵیان کردووه‌ که‌ ئیسڕائیل دوژمنی ئه‌وان نییه‌. 

ئه‌و سه‌باره‌ت به‌ ئه‌ردۆغانیش وتی: خوم به‌وه‌ نه‌گرتووه‌ که‌ به‌رده‌وام وڵامی قسه‌کانی ئه‌ردۆغانێک بده‌مه‌وه‌ که‌ ڕۆژ نییه‌ کورده‌کانی وڵاتی خۆی بۆردمان نه‌کات و ڕۆژنامه‌نووسه‌کان زیندانی نه‌کات، که‌سێک که‌ له‌ گه‌ماڕؤکان یارمه‌تی ئێرانی دا. ئه‌ردۆغان له‌و پێگه‌دا نییه‌ بۆ ئێمه‌ قسه‌ بکات.

نتانیاهۆ سه‌باره‌ت به‌ ئێران وتی: ئێران هه‌وڵ ده‌دات هێزه‌کانی خۆی له‌ سووریا جێگیر بکات به‌ڵام ئێمه‌ ڕێگه‌ به‌م شته‌ ناده‌ین و به‌ کرده‌وه‌ش سه‌ڵماندمان، ئێران هه‌وڵ ده‌دات که‌ چه‌کی دیکه‌ بۆ لوبنان بنێرێت تاکوو باڵانسی ساحه‌که‌ بگۆڕێت ئێمه‌ ڕێگه‌ ناده‌ین و دژی ده‌مارگرژییه‌کانی ئێران له‌ ناوچه‌که‌ ده‌وه‌ستینه‌وه‌.

News Code 15141

نیشانەکان

بۆچوونی ئێوە

You are replying to: .
  • 2 + 14 =