۱۳ شانۆ له‌ فستیڤاڵی شانۆی کوردی سه‌قز نمایش ده‌کرێن

به‌ڕێوه‌به‌ری ۱۴مین خولی فستیڤاڵی نێونه‌ته‌وه‌یی شانۆی کوردی له‌ سه‌قز ڕایگه‌یاند که‌ له‌ ڕۆژی پێنج شه‌مه‌وه‌ فستیڤاڵه‌که‌ ده‌ستی پێ کردووه‌ و ۱۳ به‌ره‌هه‌م نمایش ده‌کرێن.

به‌ ڕاپۆرتی ئاژانسی مێهر، عه‌لیڕه‌زا ئیسماعیلی له‌مباره‌وه‌ به‌ ئاژانسی مێهر وتی: سه‌رجه‌م ۸۲ به‌رهه‌م به‌ ده‌بیرخانه‌ی ۱۴مین خولی فستیڤاڵی شانۆی کوردی له‌ سه‌قز گه‌یشت که‌ ۶۳ به‌رهه‌میان به‌ڕاستی له‌ ئاستی به‌شداری کردن له‌ فستیڤاڵه‌که‌دا بوون و پڕۆفشناڵ بوون.

ئه‌و زیادی کرد: به‌ڵام لێژنه‌ی داوه‌ری و هه‌ڵسه‌نگاندن ناچار بوو له‌ نێوان ئه‌م ۶۳ به‌رهه‌مه‌دا ۱۳ شانۆ بۆ به‌شداری کردن و نمایش کردن هه‌ڵبژێرێت.

ئه‌و هه‌روه‌ها وتی: شانۆی "ئه‌وانگه‌ل" له‌ بیجاڕ و شانۆی "عێشا" له‌ ورمێ له‌ یه‌که‌مین ڕۆژی فستیڤاڵه‌که‌ نمایش کران که‌ ڕۆژی پێنج شه‌مه‌ ۱۶ی سه‌رماوه‌ز ده‌ستی به‌ کار کرد.

به‌ڕێوه‌به‌ری ۱۴مین خولی فستیڤاڵی شانۆی کوردی سه‌قز ئاماژه‌ی دا: شانۆکانی "دیل کراوه‌کان" له‌ مه‌ریوان، "ده‌روێش عودی" له‌ ورمێ، خه‌یاڵ له‌ پاوه‌ و "له‌ پشت درگا" له‌ بۆکان له‌ ڕۆژی دووهه‌می فستیڤاڵه‌ نمایش کران. هه‌روه‌ها "مردووه بێ کفن و ده‌فنه‌کان" له‌ مه‌ریوان، "سه‌رده‌می بێ تاوانی" له‌ مه‌هاباد، "ئیمپراتور و ئانجلۆ" له‌ تاران و "زه‌ماونی خوێن" له‌ سه‌قز له‌ سێهه‌مین ڕۆژ نمایش ده‌کرێن.

ئه‌و هه‌روه‌ها وتی: شانۆکانی پانیکه‌کان له‌ سنه‌ و په‌ریخان له‌ تاران له‌ دواین ڕۆژی فستیڤاڵه‌که‌ نمایش ده‌کرێن. هه‌روه‌ها شانۆکانی چنوور و سروودی سه‌د هه‌زار ئۆفیلیای ئه‌یندار له‌ نووسینی دوکتور قوتبه‌دین سادقی به‌ هۆی ڕێز گرتن له‌م هونه‌رمه‌نده‌ کورده‌ی بواری شانۆ، نمایش ده‌کرێن.

شایانی باسه‌ که‌ ۱۴مین خولی فستیڤاڵی شانۆی کوردی سه‌قز کاتژمێر ۲۱ی ڕۆژی یه‌کشه‌مه‌، ۱۹ی سه‌رماوه‌ز له‌ شاری سه‌قز کۆتایی به‌ کاره‌کانی خۆی دێنێت و له میانه‌ی ئه‌م چه‌ند ڕۆژه‌ چه‌ندین ڤۆرکاشاپ سه‌باره‌ت به‌ شانۆش به‌ڕێوه‌ ده‌چێت.

News Code 15077

نیشانەکان

بۆچوونی ئێوە

You are replying to: .
  • 3 + 0 =