بە ناردنی پرسەنامەیەک؛

سه‌ردار سلێمانی سه‌ره‌خۆشی کۆچی دوایی مام جه‌لالی کرد

ناسەی هەواڵ: 4108930 -
سه‌ردار قاسم سلێمانی، فه‌رمانده‌ی فەیلەقی قودسی سوپای پاسدارانی ئێران له‌ میانه‌ی پرسەنامەیەکدا سه‌ره‌خۆشی کۆچی دوایی مام جه‌لالی کرد.

به‌ ڕاپۆرتی ئاژانسی مێهر، پرسه‌نامه‌کان به‌ هۆی کۆچی دوایی جه‌لال تاڵه‌بانی درێژه‌یان هه‌یه‌ و سه‌ردار قاسم سلێمانی، فه‌رمانده‌ی فەیلەقی قودسی سوپای پاسدارانی ئێرانیش له‌ میانه‌ی په‌یامێکدا سه‌ره‌خۆشی کۆچی دوایی مام جه‌لالی کرد.

به‌ پێی ئه‌م ڕاپۆرته‌ له‌م پرسه‌نامه‌دا هاتووه‌: هه‌واڵی کۆچی دوایی به‌ڕێز جه‌لال تاڵه‌بانی نه‌ک هه‌ر خه‌ڵکی عێراق که‌ هه‌موو نه‌ته‌وه‌کانی ناوچه‌که‌ی خەمبار کرد. که‌سایه‌تییه‌ک که‌ نزیک به‌ ۶۰ ساڵ خه‌باتی کرد بۆ ئازادی هه‌موو نه‌ته‌وه‌کانی عێراق چ عه‌ره‌ب، کورد، شیعه‌، تورکمان، سوننە و ئێزدی و مه‌سیحی ، به‌ حه‌ق ناوی "مام" به‌ باڵایدا بڕابوو. که‌سایه‌تی ئه‌م پیاوه‌ گه‌وره‌ هێشتا له‌ عێراق و بگره‌ هه‌رێمی کوردستانیش به‌ باشی نه‌ناسراوه‌.

له‌ درێژه‌دا ئاماژە دراوە: تاڵه‌بانی که‌سێک بوو که‌ کورسییه‌ نوێیەکان هیچی به‌و زیاد نه‌ده‌کرد، به‌ڵکوو ئه‌وه‌ ئه‌و بوو که‌ بایه‌خی به‌ کورسییه‌کان ده‌دا و به‌ ده‌یان جار بووه‌ هۆکاری ڕزگار بوونی هه‌موو خه‌ڵکی عێراق له‌ شه‌ڕ و ئاژاوه‌ و ناکۆکی. ئه‌وه‌ ئه‌و بوو که‌ مافی ڕه‌وای گه‌لی کوردی له‌ یاسای بنه‌ڕه‌تی عێراق چه‌سپاند و هاوکات له‌ مافی هه‌موو عێراقییه‌کانی دیکه‌ش پشتیوانی ده‌کرد. که‌سایه‌تییه‌ک که‌ هه‌موو مافی شارۆمه‌ندانی عێراقی له‌ چوارچێوه‌ی یاسایه‌کی بنه‌ڕه‌تی بۆ عێراقێكی یه‌کپارچه‌ ده‌سته‌به‌ر کرد.

ئه‌م فه‌رمانده‌ ئێرانییه‌ وتیشی:تاڵه‌بانی مه‌زن جیهانی ئیسلام و ئێرانی به‌ دوو بابه‌تی قووڵای ستراتیژیک ده‌بینی و هه‌ر به‌م بۆنه‌شه‌وه‌ ئه‌م دوو بابه‌ته‌ له‌ لای سه‌رۆک کۆماری کۆچ کردووی عێراق هێڵی سوور بوون و ڕێگه‌ی نه‌ده‌دا ئه‌م هێڵه‌ سوورانه‌ ببڕێت. تاڵه‌بانی بێ ئه‌وه‌ی گوێ به‌ هه‌ڕه‌شه‌کانی ئه‌مریکا بدات، باشترین په‌یوه‌نده‌ی له‌گه‌ڵ ئێران هه‌بوو چون هه‌موو ڕاستییه‌کان و به‌رژوه‌ندییه‌ هاوبه‌شه‌کانی ناوچه‌که‌ی به‌ باشی و به‌ وردی ده‌ناسی.

ئەوەشی نووسیوە کە  ئه‌و هه‌رگیز مۆڵه‌تی به‌ په‌یوه‌ندی له‌گه‌ڵ ڕژیمی زایۆنی نه‌دا و له‌ ڕووی که‌سایه‌تیشه‌وه‌ یه‌ک بوو له‌ خۆش ڕه‌فتارترین که‌سایه‌تییه‌کانی ناوچه‌که‌ و یه‌کجار قسه‌ خۆش بوو، ئه‌مه‌ وه‌های کردبوو هه‌موو که‌س ڕێز له‌ که‌سایه‌تی ئه‌و بگرێت. کتێبخانه‌که‌ی مام جه‌لال پڕ بوو له‌ کتێبی ئیسلامی و چاره‌نووسی ئه‌و که‌سایه‌تییه‌ گه‌وره‌ شۆڕش گێڕانه‌ی جیهان و له‌م بابه‌تانه‌ش به‌ وردی وانه‌ی وه‌رده‌گرت و ئه‌مانه‌ش وه‌های کردبوو که‌ له‌ عێراقدا ببێته‌ کۆتایی هه‌موو ناکۆکییه‌کان. ئه‌مڕۆ شوێنی ئه‌م هاوڕێ ئازیز و به‌رزه‌ یه‌کجار خاڵییه‌ و به‌ تایبه‌ت قه‌یرانی ئێسته‌ی هه‌رێمی کوردستان که‌سایه‌تییه‌کی وه‌ها پێویسته‌. که‌سایه‌تییه‌ک که‌ هه‌رگیز سواری هه‌ست و سۆزی خه‌ڵک نه‌ده‌بوو به‌ڵکوو به‌رده‌وام هه‌وڵیشی ده‌دا هه‌ست و سۆزی خه‌ڵک به‌ره‌و عه‌قڵانییه‌ت ببات.

سه‌ردار سلێمانی جه‌ختی کردووه‌: تاڵه‌بانی هه‌موو ژیانی خۆیی بۆ عێراق ته‌رخان کرد و به‌ حه‌ق ده‌توانین ناوی شه‌هیدی ڕێگه‌ی عێراق له‌م که‌سایه‌تییه‌ بنێین، تاڵه‌بانی قوتابخانه‌یه‌کی باشی له‌ دوای خۆی جێهێشتووه‌ و هیوادارم شاگرده‌کانی قوتابخانه‌ی مام جه‌لال وه‌ک ئه‌و به‌ وردی هه‌موو بابه‌ته‌کانی ناوچه‌که‌ و جیهان بخوێننه‌وه‌ و عه‌قڵانیه‌ت به‌ سه‌ر هه‌ست و سۆزدا زاڵ بکه‌ن و ڕێگه‌ی ئه‌م پیاوه‌ گه‌وره‌ درێژه‌ پێبده‌ن.

له‌ کۆتاییدا هاتووه‌: من به‌ش به‌ حاڵی خۆم بۆ کۆچی دوایی ئه‌م که‌سایه‌تییه‌ گه‌وره‌ و مامۆستا خه‌باتکاره‌ و که‌سایه‌تی ئه‌خلاق و ئه‌ده‌بی ئیسلامیییه‌ تازیه‌تبار و شینگێڕم، سه‌ره‌خۆشی ئه‌م خه‌مه‌ گه‌وره‌ش له‌ بنه‌ماڵه‌ی به‌ڕێزی تاڵه‌بانی، هاوژین و منداڵه‌کانی و هه‌موو ڕێبه‌رانی هه‌رێمی کوردستان به‌ تایبه‌ت یه‌کێتی نیشتمانی کوردستان ده‌که‌م و بۆ ئه‌و هاوڕێیە سه‌فه‌ر کردووه‌ باڵاترین شوێن و پله‌ له‌ لای خوای گه‌وره‌ و مه‌زن داوا ده‌که‌م.

ناردنی بۆچوون

1 + 1 =