باڵوێزی ئێران له‌ عێراق:

کورد باشترین دۆستی ئێرانه‌/پشتیوانی لە رێککەوتنی هەولێر و بەغدا دەکەین

ناسەی هەواڵ: 4076224 -
باڵوێزی ئێران لە عێراق به‌ ئاماژه‌ به‌ دۆستایه‌تی نێوان کوردی عێراق و ئێران وتی: پشتیوانی لە هەر رێککەوتنێک دەکەین لەنێوان هەولێر و بەغدا ئەنجام بدرێت".

به‌ ڕاپۆرتی ئاژانسی هه‌واڵی مێهر، ئیرەج مەسجدی، باڵوێزی ئێران لە عێراق لە وەڵامی پرسیارێکی تۆڕی میدیایی رووداو لەبارەی ئەنجامدانی ڕێفراندۆم لە کەرکووک و هەڵوێستی ئێران وتی:"خەڵک خۆیان چارەنووسیان دیاریی دەکەن".

وتیشی:"خەڵکی ئەم وڵاتە خۆیان چارەنووسی خۆیان دیاریی دەکەن، ئەوەی روونە کۆماری ئیسلامی ئێران لەگەڵ یاسا و یەکگرتوویی و یەکڕیزی عێراقە و هەر رێککەوتنێک لە نێوان هەولێر و بەغدا بکرێت پشتیوانی لێدەکەین".

باڵوێزی ئێران لە عێراق کە بۆ نوێژی جەژن لە یەکێک لە حوسەینییەکانی بەغدا بوو، وتی: "بۆ ئێمە خەڵکی کەرکووک و بەسرە و هەولێر و موسڵ جیاوازی نییە و هەموویان برای خۆشەویستی ئێمەن".

ئیرەج مەسجدی کوردی بە باشترین دۆستەکانی ئێران دانا و وتی: "کورد لە عێراق لە باشترین دۆستەکانی کۆماری ئیسلامی ئێرانن بە درێژایی مێژوو، ئێمە سڵاومان هەیە بۆ هەموو کوردێک و جەژنیان پیرۆزبایی لێدەکەین و ئارەزووی تەندروستی و سەرکەوتنیان بۆ دەخوازین".

ئیرەج مەسجدی ، باڵوێزی ئێران لە عێراق سەبارەت بە داهاتووی عێراق وتی: "هیوادارین عێراق رۆژ لە دوای رۆژ بەرەو پیشکەوتن و گەشە و خۆشبەختی و باشتربوون بڕوات، کۆماریی ئیسلامی ئێرانیش لەگەڵ عێراقە و هەر یارمەتییەک لەدەستمان بێت ئەنجامی دەدەین".

لەبارەی رێککەوتن بۆ هاتنی چەکدارانی داعش بۆ سنووری عێراق ، باڵوێزی ئێران وتی: "تیرۆریستەکان لە عێراق و سووریا لە پێکدادانن لەگەڵ ئەو حکومەتانە و هەردوو وڵات هەوڵدەدەن وڵاتەکەی خۆیان لە هەبوونی ئەوان پاک بکەنەوە، لە نێوان ئەو دوو وڵاتە پەیوەندی هەبووە، دەبێت هەردوو وڵات هەوڵبدەن ناوچەکانی خۆیان لە هەبوونی داعشەکان پاکسازی بکەن، هەروەک گەلی ئەو دوو وڵاتە دەزانن کۆماری ئیسلامی ئێران خەریکی یارمەتیدانی ئەو دوو وڵاتەیە".

باڵوێزی ئێران وتی: "ئەم قسە و باسانە هیچ کاریگەری لەسەر پرسەکە نابێت ، گرنگ ئەوەیە کە هەموو هیممەت بکەن و بۆ لەنێوبردنی تیرۆریستەکان هەنگاوی کاریگەر بهاوێژن."

ناردنی بۆچوون

8 + 2 =