داعش له‌ ڕه‌قه‌ چه‌کی کیمیایی به‌کار دێنێت

دوابه‌دوای پێشڕه‌وی زیاتری هێزه‌ کوردییه‌کان له‌ شاری ڕه‌قه‌، نیگه‌رانییه‌کان سه‌باره‌ت به‌ به‌کارهێنانی چه‌کی کیمیایی له‌ لایه‌ن داعشییه‌کان له‌ دژی ئه‌م هێزانه‌ به‌رز بووه‌ته‌وه‌.

به‌ ڕاپۆرتی ئاژانسی مێهر له‌ ڕاشا توده‌ی، چالاکانی سووری ڕایانگه‌یاند: داعش له‌ ڕه‌قه‌ چه‌کی کیمیایی به‌ده‌سته‌وه‌یه‌ و ده‌یه‌وێت له‌ ئه‌گه‌ری پێشڕه‌وی زیاتری هێزه‌ کوردییه‌کان ناسراو به‌ هێزی دیموکڕاتیکی سووریا له‌م چه‌کانه‌ که‌ڵک ببات.

به‌ پێی ئه‌م هه‌واڵه‌، زانیارییه‌کان له‌مباره‌وه‌ نیگه‌رانی زۆری له‌ سه‌ر ژیانی دانیشتوانی شاری ڕه‌قه‌ دروست کردووه‌. شاری ڕه‌قه‌ به‌ پایته‌ختی تیرۆریسته‌کانی داعش ده‌ناسرێت و له‌م دواییه‌دا به‌رده‌وام له‌ لایه‌ن فڕۆکه‌کانی هاوپه‌یمانی دژه‌ داعش کراوه‌ته‌ ئامانج.

هێزه‌ کوردییه‌کان توانیانه‌ به‌شێکی زۆری شاری ڕه‌قه‌ ئازاد بکه‌ن و له‌ ئێستادا ۶۰ له‌ سه‌دی ئه‌م شاره‌ کۆنترۆڵ بکه‌ن، به‌ تایبه‌ت له‌ دوو ڕۆژی پێشوودا به‌شێکی زۆری باشووری شاره‌که‌یان ئازاد کردووه‌ که‌ گرنگی زۆری بۆ داعش هه‌بووه‌. ئه‌م پێشڕه‌ویانه‌ به‌ پشتیوانی ئاسمانی فڕۆکه‌کانی هاوپه‌یمانی دژه‌ داعش ئه‌نجام ده‌بێت که‌ ئه‌مریکا ڕێبه‌ری ده‌کات.

هاوپه‌یمانی دژه‌ داعش چه‌ند ڕۆژ پێش ئێستا چه‌ند ناوچه‌یه‌کی ده‌یره‌زووری بۆردمان کرد و بووه‌ هۆی کوژرانی ۶۰ که‌سی سڤیل.

شایانی باسه‌ که‌ ئۆپراسیۆنی ئازاد کردنی شاری ڕه‌قه‌ ماوه‌ی چه‌ند مانگێکه‌ له‌ لایه‌ن کوردی سووریاوه‌ ده‌ستی پێ کردووه‌ و ئه‌مریکاش پشتیوانی ئاسمانیان ده‌کات. ڕێکخراوه‌کانی مافی مرۆڤ سه‌باره‌ت به‌ کوژرانی که‌سانی سڤیل له‌ هێرشه‌ ئاسمانییه‌کان هۆشداری زۆریان به‌ ئه‌مریکا و هاوپه‌یمانه‌کانیان داوه‌.

News Code 11674

نیشانەکان

بۆچوونی ئێوە

You are replying to: .
  • 6 + 0 =