یادی سینه‌ماکارێکی کورد له‌ بانه‌ به‌ڕێوه‌ چوو

چواره‌مین ساڵیادی کۆچی دوایی ده‌رهێنه‌ری ناسراوی کورد، ته‌ها که‌ریمی له‌ سه‌ر گۆڕه‌که‌ی له‌ سلێمان به‌گی بانه‌ به‌رز ڕاگیرا.

به‌ ڕاپۆرتی ئاژانسی مێهر، دوێنێ ئێواره‌ له‌ سڵێمان به‌گی بانه‌، ئێواره‌ کۆڕێک بۆ یادی ته‌ها که‌ریمی، سینه‌ماکاری کۆچ کردوو و ناسراوی کورد به‌ڕێوه‌ چوو.

به‌ پێی ئه‌م ڕاپۆرته‌، له‌م ڕێوڕه‌سمه‌دا هونه‌رمه‌ندان، شاعران، سینه‌ماکاران، ئه‌کته‌ر و ڕۆشنبیرانی کورد به‌شدارییان کردبوو. له‌م ڕێوڕه‌سمه‌دا دایک و باوکی ئه‌م ده‌رهێنه‌ره‌ کورده‌ چوار نمامی داڕ به‌ڕوویان بۆ زیندوو هێشتنه‌وه‌ی یادی ته‌ها که‌ریمی چاند.

ته‌ها که‌ریمی ده‌رچووی به‌شی سینه‌مایی زانکۆی هونه‌ری تاران بوو، ئه‌و دوای دروست کردنی چه‌ندین کورته‌ فیلم و به‌شداری کردن له‌ فستیڤاڵه‌ ناخۆییه‌کان و جیهانییه‌کان توانی ناوبانگێک به‌ ده‌ست بێنێت و دواجار ده‌ستی دایه‌ دروست کردنی چه‌ند فیلمێکی درێژی سینه‌مایی به‌ ستایلی تایبه‌ت به‌ خۆی که‌ له‌ لایه‌ن بینه‌ری کورده‌وه‌ بووه‌ جێگه‌ی سه‌رنج و تێڕامان.

به‌ تایبه‌ت فیلمی سینه‌مایی "کوێستانی قه‌ندیل" که‌ قوتبه‌دین سادقی ڕۆڵی تێداگێڕا و به‌ مۆسیقای فه‌ردین خه‌لعه‌تبه‌ری توانی خه‌ڵاتی ئۆرێنسی ئیسپانیا بۆ باشترین فیلمنامه‌ به‌ ده‌ست بێنێت. فیلمه‌کانی دیکه‌ی کۆچ کردوو، ته‌ها که‌ریمی بریتین له‌ سنووری ژیان، زریان، سه‌مای مروارییه‌کان، کوێستانی قه‌ندیل، کوێستانی سپی، به‌کرێگیراوی سپی و هه‌زار سێف.

که‌ریمی له‌ دایکبووی ساڵی ۱۳۵۴ی گوندی بوئێن له‌ بانه‌یه‌ و له‌ ساڵی ۱۳۹۲ی هه‌تاوی و به‌ هۆی ڕووداوێکی هات و چووه‌وه‌ کۆچی دوایی کرد.

شایانی باسه‌ ماوه‌ی چه‌ند ساڵێکه‌ که‌ سینه‌مای کوردی له‌ جیهاندا په‌ره‌ی به‌رچاوی به‌ خۆیه‌وه‌ دیوه‌ و له‌م نێوانه‌دا هونه‌رمه‌ندانی کوردی ئێران جێگه‌ی تایبه‌ت به‌ خۆیان هه‌یه‌ و ساڵانه‌ به‌ ده‌یان خه‌ڵاتی نێونه‌ته‌وه‌یی به‌ ده‌ست دێنن.

News Code 10357

نیشانەکان

بۆچوونی ئێوە

You are replying to: .
  • 2 + 13 =