بەیادی ٢٦ کچی سوخمە پۆشەوە;

لە پەراوێزی شێعرە نەمرەکەی پیرەمێرد دا

ناسەی هەواڵ: 3933412 -
زۆر کۆن، زۆر کۆنتر لە عومری من و رەنگە کۆنتر لە عومری تۆ کە ئەم دەقە دەخوێنیتەوە، بەربەیانێ خەڵکی سلێمانی دوا بڕیار دەدەن: ئەمساڵ ئاگری نەورۆز دەکەینەوە، ئەگەر دوارۆژی ژیانمان بێت.

ئاژانسی مێهر، کامبیز کەریمی؛ هه‌ر له‌ سه‌ره‌تای ئه‌م نووسیه‌نه‌ داوای لێبووردن ده‌که‌م، ئەگەر لەم دەمەو نەورۆزە ناختان تاڵ دەکەم. باش دەزانم؛ دەزانن ئێمە خاونی مێژوویکی خەمناکین.

هەمیشە یەکەمین رۆژی ساڵی تازە، بۆ من، رۆژیکی خەمناک بووە- شەڵالی شیوەن و ئاوێزانی خەفەت- وەک ئێوارانی هەینی کە حەز ئەکەم، یان بمرم یان بخەوم. تووشی دڵەراوکێکی سەیر دەبم، کاتژمێر ١٠ی سەر لە بەیانی رێک ١٠، ناسکه‌ گه‌رمایه‌ک لە دەستی چەپمەوە دادەگرسێت، کاتژمێر ١٠ و یەک خوله‌ک لێدانی دڵم مەیلەو زیاد ده‌ڕوات، ١٠ و دوو خوله‌ک خەریکم خۆم گورج دەکەمەوە، ١٠ و سێ خوله‌ک شتێکم وون کردووە و نازانم چییە، ١٠ و چووار خوله‌ک خۆم دەگەێنمە کووچە، شەقام چۆڵە جاڕێ، ١٠ و پێنج خوله‌ک ئیتر دڵنیا دەبم کارەساتێ روویداوە و من بێخەبەرم: بۆمەلەرزەیەک، لافاوێ، ئەنفاڵێ، کۆمەڵکۆژیێ، هەر هیچ نەبێ خۆ دوو سێ کەس مردوون، بێ گومان.

مۆبایلەکەم دەردێنم و گوێ ڕادەگرم:

"ئه‌م ڕۆژی ساڵی تازه‌یه نه‌ورۆز هاته‌وه

جه‌ژنێكی كۆنی كورده به خۆشی و به‌ هاته‌وه"

ئەمە دەسپێکی گۆرانیێکە کە کورد نییە نەیبیستبێت.

زۆر کۆن، زۆر کۆنتر لە عومری من و رەنگە کۆنتر لە عومری تۆ کە ئەم دەقە دەخوێنیتەوە، بەربەیانێ خەڵکی سلێمانی دوا بڕیار دەدەن : ئەمساڵ ئاگری نەورۆز دەکەینەوە، ئەگەر دوارۆژی ژیانمان بێت.

"چه‌ند ساڵ بوو گوڵی هیوای ئێمه پێ په‌ست بوو تاكو پار

هه ر خوێنی لاوه كان بوو گوڵی ئاڵی نه‌و به‌هار:

سەردەمی مەلیک بوو، کامیان؟ مەلیک فەیسەڵ، مەلیک غازی، چووزانم مەلیک مار. کوڕ و کچ، ژن و پیاو مناڵ و پیر لە بناری سەیوان کۆ دەبنەوە،

"ئه‌و ڕه‌ نگه سووره بوو كه له ئاسۆی بڵندی كورد

موژده‌ی به‌یانی بۆ گه‌لی دوور و نزیك ئه‌برد"

ئەمساڵ ئاگری نەورۆز ئەکەینەوە، ئەگەر دوارۆژی ژیانیشمان بێت. سەربازەکانی سوپای مەلیک، گەمارۆیان دەدەن و ئاگاداریان دەکەنەوە ئاگر کردنەوە و هەڵپەڕکێ وەکوو دوو نه‌ریتی مەجووس قەدەغەیە. ئەمساڵ ئاگری نەورۆز ئەکەینەوە، ئەگەر دوارۆژی ژیانیشمان بێت، کۆڕ وتی:

سینگمان دەکەینە قەڵغانتان ئەگەر دوارۆژی ژیانیشمان بێت،

کچ وتی: " نەورۆز بوو ئاگرێكی وه‌های خسته جه‌رگه وه

لاوان به عه‌شق ئه‌چوون به‌ره و پیری مه‌رگه وه"

فەرمانده‌ی سوپای مەلیک دوایین فەرمانی خۆی رادەگەینێت: ئاگر بە ئاگری گوللە وڵام دەدەینەوە.

له‌مه‌ به‌دوا؛ هەر دایکە و دەبێتە قەڵغانی کوڕی، هەر کچە و دەبێتە قەڵخانی دەزگیرانی.

"تا ئێستا رووی نه‌داوه له تاریخی میلله‌تا

قه‌ڵغانی گولله سنگی كچان بێ له هه‌ڵمه‌تا"

ئەڵلا ... هەر گوللەیە و سوخمە سەر ئەبڕێ، هەر گوللەیە و سینگی کچان دەدڕێت، هەرگوللەیە و وەک سەگ لە مەمکی ئاگر ئەوەڕێت...

"ئه‌وا ڕۆژهه‌ڵات، له به‌نده‌نی به‌رزی وڵاته‌وه

خوێنی شه‌هیده ڕه‌نگی شه‌فه‌‌ق شه‌و‌ق ئه‌داته‌وه"

سەیری خۆم دەکەم لە کووچە، شەقام چۆڵە، جاڕێکی دی بیر لە حاڵی پیرە مێرد دەکەمه‌وه‌: خوایە کاتێک ئەم شێعرەی نووسیوە، چەند گریا بێت.

هەمیشە لە یەکەمین رۆژی ساڵی تازە لە کووچە، شەقام که‌ هه‌ر چۆڵە جاڕێ، ئەگەر کەسێ بمبینێت، دڵنیا دەبێت؛ بۆ من کارەساتێ روویداوە، بۆمەلەرزەیەک، لافاوێ، ئەنفاڵێ، کۆمەڵ کوژیەک، هەر هیچ نەبێ خۆ دوو سێ کەسێک مردوون. من دەگریم و پیرە مێرد دەڵێت:

پێی ناوێ بۆ شه‌هیدی وه‌ته‌ن شیوه‌ن‌ و گرین

نامرن ئه‌وانه وا له‌ دڵی میلله‌تا ئه‌ژین.

گۆرانیەکە کە دەگاتە ئێرە، دڵنیا دەبم ساڵی تازەیە و من بێخەبەرم. دەڵنیا دەبم ئەو ٢٦ کچەی ئەو رۆژە کوژران هەموو ساڵێ نەورۆز، بۆ 5 خوله‌ک دێنەوە و سەردانی سلێمانی دەکەن. دڵنیا دەبم:

" ئه‌م ڕۆژی ساڵی تازه‌یه نه‌ورۆز هاته‌وه

جه‌ژنێكی كۆنی كورده به خۆشی و به‌ هاته‌وه"

ناردنی بۆچوون

6 + 9 =