ڕووناک وەفایی

ئه‌له‌و ۱۲۵

ناسەی هەواڵ: 3886157 -
"پاسە دیارەن ئارۆ پێسەو باقی ڕوەکا نەبێ، ئارۆ ڕۆ سیسیای گوڵا و ڕۆ پەلەقاژێ بوڵبوڵا بێ، باخەوان تۆ هارەقوو تەوێڵێت بسەڕە."

ئەلەو ۱۲۵؟
دڵ ئایرش گێرتەن!
بەختە سۆتێنە!
ویژدان مەردەرە!
شمە ئایروو هەڵسا کوشندێوە؟
زوو زوو دیێ مۆبایلەکەیشەرە. ڕۆ جە ئەۮا بیەیش بێ. سەعات هەشتوو سۆحی تاتەش چفناش گۆششەرە: وەڵێ عەسری مەوە خەڵاتی ماروو پەی جگەر گۆشەکێم. ئێۮە فریشتڵا خۆنا.

بەڵام عەسر ئامە، عەسر لوا. وێرەگا ئامە، وێرەگا لوا. ئاسمان سیاوش پۆشا، پەی ئێۮێ ئانە دڵەورکێ دایمەی بێ. بەڵام ئەجۆ ئارۆ ڕەوتش واڕیان. شێنەی شێنەی دڵوو ئاسمانی ئارام بیوە و جلە سیاوەکێش دڕیێشەرە. ڕۆ جە ئەۮا بیەیش سەوز ئامە و زەرد لوا. جە ئارۆوە چواردە ڕوێ تەر باوشەو تاتەیشەنە بێ بەڵام پانزەهۆمینش ... سۆح، چەنی تاتەیش ئامە و بێ تاتەیش ویەرد. خەڵاتیش گەرەک نەبێ ئێتر، تەنیا تاتەش گەرەکش بێ.

یۆ یۆ خەڵاتیە وەڵینەکاو تاتەیش بەرێ لاو دەلاقەکەی، چواردە دانێ، گەرەکش بێ خەمێشا سرەوا. مەزا چی توەنەو دلێ خاکیچ خەمینە بێ. ئیجار وەیوڵێش گەرەکە نەبێ پەی خەڵاتیش، گەرەکش بێ وێش وەیوڵێ باوشەو تاتەیش بۆ! جە تەلەفزیۆنی بێزارە بیە، ئایر بێ.

وەختێو ئایرش دیایا نانەش بیزیێ. حەز نەکەرێ بۆنەو نانێوە هیچ یاگیە ئایر گێرۆ. بەڵام نەزانێ تاتەش بۆنەو نانێوە نەلێ ئایرەو کوشنای، بۆنەو دڵیوە لوێ. تاتەش پلاسکۆنە بێ. گردوو ئا دەسەو ڕەفێقا بە لیباسە تڵاینەکاشاوە لوای باوشەو ئایر و دووکەڵ و وێرانەی.

ئەرێ ئەرێ سێنزە نەحس نیەن، پانزەهمین ڕۆ جە ئەۮا بیەو ئێۮێ نەحس بێ.

پاسە دیارەن ئارۆ پێسەو باقی ڕوەکا نەبێ، ئارۆ ڕۆ سیسیای گوڵا و ڕۆ پەلەقاژێ بوڵبوڵا بێ، باخەوان تۆ هارەقوو تەوێڵێت بسەڕە.

۱۲۵هۆر کڵاشیان نەقشش دلێ دڵوو وەیوڵێ پاڵوو دەلاقەی.
۱۲۵مۆرەش کۆیا قەڐوو تەوێڵەو وێژدانی.
۱۲۵باڵێش سۆتێ، بەڵام ئاسمان ناستش سەرەرەوسەو فڕیای بۆ.
ئەلەو ۱۲۵؟.........

ناردنی بۆچوون

3 + 12 =