کتێبخانه‌ی کوردی به‌رهه‌می بۆ تازه‌لاوان نییه‌/نووسه‌ره‌ ڕاسته‌قینه‌کان خه‌ریکه‌ ده‌خنکێن

به‌رپرسی بڵاڤگه‌ی مانگ به‌ ئاماژه‌ به‌ هه‌ژاری کتێبخانه‌ی کوردی له‌ به‌شی تازه‌لاوان پێیوایه‌ ئێستا ئه‌وه‌نده‌ نووسه‌ر سه‌ریهه‌ڵداوه‌ که‌ نووسه‌ره‌ ڕاسته‌قینه‌کان خه‌ریکه‌ ده‌خنکێن.

هادی کیا، چالاکی بواری چاپ و بڵاوکردنه‌وه‌ی کتێب و  به‌رپرسی بڵاڤگه‌ی مانگ له‌ دیمانه‌ له‌گه‌ڵ هه‌واڵنیری مێهر وتی: بڵاڤگه‌کان ده‌بێ فیلته‌ریان بۆ خۆیان هه‌بێت و هه‌ر بابه‌تێک که‌ گه‌یشته‌ ده‌ستیان چاپی نه‌که‌ن. چونکوو هه‌موو شتێک شایانی ئه‌‌وه‌ نییه‌ چاپ بکرێت.

ئه‌و ڕه‌خنه‌شی گرت که‌ هه‌ندێ له‌ بڵاڤگه‌کان هه‌ر بابه‌تێک بگاته‌ ده‌ستیان چاپی ده‌که‌ن و وتی: ئه‌و کاره‌ نه‌ک ته‌نیا خه‌سار له‌ بڵاڤگه‌کان ده‌دات؛ ئێستا ئه‌وه‌نده‌  نووسه‌ری زیاد کردووه‌ و هه‌ر که‌سێک دێت و ڕه‌شنووسه‌کانی چاپ ده‌کرێت که‌ به‌ راستی ئه‌مه‌ بووته‌ هۆی ئه‌وه‌ی که‌ نووسه‌ره‌ ڕاسته‌قینه‌کان له‌ ژێر هوروژمی ئه‌و هه‌موو بابه‌ته‌ بێ ناوه‌ڕۆکانه‌دا  خه‌ریکه‌ ده‌خنکێن.

وتیشی: کتێب فرۆش و بڵاوکه‌ره‌وه‌کانی ئێمه‌ زۆربه‌یان کتێب خوێن نین و کتێب ناناسن و ته‌نیا وه‌ک کاڵایه‌کی بازرگانی سه‌یری کتێب ده‌که‌ن و به‌ دوای قازانج و سوودی مادی زیاتره‌وه‌ن .

کیا رایگه‌یاند: ئێمه‌ ده‌بێ کتێب خوێن دروست بکه‌ین ئه‌وه‌ سه‌رمایه‌یه‌ بۆ ئێمه‌ی بڵاوکه‌ره‌وه‌ و کتێب فرۆش، ده‌بێ خوێنه‌ر دروست بکه‌ین که‌ بگه‌ڕێته‌وه‌ لامان و دووباره‌ کتێب بکڕێت نه‌ک وه‌ک دووکانداری سه‌یری ئه‌م کاره‌ بکه‌ین.

هادی کیا سه‌باره‌ت به‌ چالاکی بڵاڤگه‌ی مانگ وتی:ئیمه‌ له‌ ۴ ساڵی ڕابردووه‌وه‌ ده‌ست به‌ کار بووین. ۱۶۰ بابه‌ت کتێبمان چاپ کردووه‌ و ۱۵ بابه‌تی دیکه‌ کتێبمان له‌ چاپ خانه‌کانه‌ که‌ مانگێکی  دێته‌ بازاڕ. له‌ بواری ئه‌ده‌بیاتی منداڵان، گه‌وره‌ساڵان و زانستی مرۆڤی کار ده‌که‌ین.

جه‌ختیشی کرد که‌ به‌شێکی زۆری کاره‌کانمان ئه‌ده‌بیاتن، پلانمان هه‌یه‌ گرینگی زیاتریش بده‌ینه‌ به‌شی ئه‌ده‌بیاتی منداڵان و تازه‌لاوان. ئێستا به‌شێکی منداڵانمان به‌ ناوی ئه‌ستێره‌ و به‌شی تازه‌لاوانمان به‌ ناوی ئاسۆ کردووه‌ته‌وه‌ چونکوو به‌ راستی کتێبخانه‌ی کوردی به‌شی تازه‌لاوانی به‌تاڵه‌.

کیا له‌باره‌ی ئاستی کتێبخانه‌ی کوردیه‌وه‌ وتی: پێم وایه‌ کتێبخانه‌ی کوردی له‌  چاو کتێبخانه‌کانی گه‌لانی دیکه‌ی جیهان زۆر خاڵی و به‌تاڵه‌ و که‌مایه‌سی زۆره‌ و زۆر هه‌ژاره و له‌ به‌شی تازه‌لاوان(نه‌وجه‌وان) دا زۆر هه‌ژارتره‌ و ده‌توانین بڵێین هیچی نییه‌. بۆ وێنه‌ منداڵێک کاتێک ته‌مه‌نی له‌ خوێندنه‌وه‌ تیتیل و بی بیل ده‌رئه‌چێ ئیتر کتێبمان نییه‌ بیده‌ینه‌ ده‌ستی که‌ له‌گه‌ڵ ته‌مه‌نی ئه‌ودا هاوڕێژ بێت تا کاتێک گه‌وره‌ ده‌بێت. واتا بۆ چه‌ندین ساڵ له‌ نێوان منداڵی تا گه‌وره‌ ساڵی کتێبخانه‌ی کوردی کتێبی نییه‌ بۆ منداڵه‌کانی ئێمه‌.

له‌باره‌ی ئاستی کتێب خوێندنه‌وه‌ له‌ کوردستان وتی: له‌م وڵاته‌دا زۆر شت هۆکارن بۆ ئه‌وه‌ی خه‌ڵک کتێب نه‌خوێندرێته‌وه‌. به‌شێکی زۆری ئه‌وه‌یه‌ که‌ باوک و دایکانی ئێمه‌ زۆربه‌یان نه‌خوێنه‌وار بوون و ئێمه‌یان له‌گه‌ڵ کتێب ڕانه‌هێناوه‌، سیسته‌می فێرکاری و بارهێنانی ئه‌م وڵاته‌ش زۆر تاوانباره‌ له‌وه‌ی خه‌ڵک کتێب ناخوێننه‌وه‌ چونکوو باسی کتێب و کتێب خوێندن هه‌ر له‌ سیسته‌می بارهێنانی ئێراندا نییه‌ و مامۆستایانی قوتابخانه‌کان زۆربه‌یان خۆیان هه‌ر کتێب ناخوێننه‌وه‌ و فێری منداڵیش ناکه‌ن کتێب بخوێنێته‌وه‌.

ئاماژه‌شی دا که‌ هۆکاری به‌شێک له‌ کتێب نه‌خوێندنه‌وه‌ی ئێمه‌ په‌یوه‌ندی به‌ باری ئابووری خه‌ڵکه‌وه‌ هه‌یه‌ به‌ڵام  چاپه‌مه‌نی و بڵاڤگه‌کانیش تاوانیان هه‌یه‌ له‌مباره‌وه‌ و کتێبی بێ ناوه‌ڕۆکی زۆر چاپ ده‌بێت که‌ خوێنه‌ر دڵسارد ده‌کاته‌وه‌ و ڕایناکێشێت.

News Code 22401

نیشانەکان

بۆچوونی ئێوە

You are replying to: .
  • 1 + 2 =