کامبیز که‌ریمی شاعرێکە به‌ هه‌ناسه‌ی کۆڵان و شه‌قامه‌کانی سنه‌

ڕۆمان نووسی ناسراوی کورد له‌ کۆبوونه‌وه‌ی پەردەلادان له‌ ئەلبۆمی ئێواره‌ی مناڵی به‌رهه‌می کامبیز که‌ریمی، وتی: هه‌ناسه‌ی کۆڵان و شه‌قامه‌کانی سنه‌ له‌ شێعره‌کانی کامبیز دایه‌.

به‌ ڕاپۆرتی ئاژانسی مێهر، دوێنێ ئێواره‌ ڕێوڕه‌سمی ڕوونوێنی له‌ سی دی ئێواره‌ی مناڵی له‌ یانەی کورد به‌ به‌شداری لاینگرانی زمان و ئه‌ده‌بی کوردی به‌ڕێوه‌ چوو.

ئه‌م سی دییه‌ که‌ بریتییه‌ له‌ ۱۵ شێعری کامبیز که‌ریمی به‌ ده‌نگی خودی شاعره‌وه‌ خوێندراوه‌ و شارام عه‌لی موحه‌مه‌دی مۆسیقاکه‌ی داڕشتووه‌ و مه‌هدی زیائه‌دینی ڕووبه‌رگه‌که‌ی کێشاوه‌.

له‌ سه‌ره‌تای ئه‌م مه‌راسمه‌، ئه‌مین مورادی سه‌رۆک حه‌وزه‌ی هونه‌ری کوردستان وتی: له‌و کاته‌وه‌ که‌ ڕێبه‌ری سه‌ردانی کوردستانی کردووه‌ و کوردستانی به‌ پارێزگایه‌کی فه‌رهه‌نگی ناو برد بۆ ئێمه‌ ده‌رفه‌تی زۆر باش دروست بووه‌ تاکوو خزمه‌ت به‌ هونه‌ر و هونه‌رمه‌ندان بکه‌ین.

ئه‌و زیادی کرد: حه‌وزه‌ی هونه‌ری کوردستان هه‌موو هه‌وڵی خۆی داوه‌ تاکوو ئه‌م ئامانجه‌ بپێکێت و ئه‌وه‌ی له‌ ده‌ستی دێت بۆ هونه‌ر و فه‌رهه‌نگی کوردی ئه‌نجامی بدات. ئێسته‌ش ستۆدیۆی تۆمار کردنی ده‌نگ له‌ سینه‌ما به‌همه‌نی سنه‌ ئاماده‌یه‌ پێشوازی له‌ هونه‌رمه‌ندانی کورد بکات بۆ تۆمار کردنی به‌رهه‌کانیان.

وتیشی: گومانی تێدا نییه‌ که‌ هونه‌رمه‌ند به‌ بێ به‌رده‌وام بوون له‌ پڕۆسه‌ی به‌رهه‌م هێنان ناتوانێت به‌رده‌وام بێت، کامبیز که‌ریمی یه‌کێکه‌ له‌ مامۆستایانی بواری ئه‌ده‌بی کوردی که‌ به‌ڕاستی هه‌میشه‌ کارێکی بۆ ئه‌نجام دان به‌ ده‌سته‌وه‌یه‌. کاتی خۆی هات و پێشنیاری بڵاو کردنه‌وه‌ی ئه‌م سی دییه‌ باش و به‌ نرخه‌ی دا، ئێمه‌ش پشتیوانیمان کرد چون چ خزمه‌تێک و به‌رهه‌مێک له‌مه‌ باشتر هه‌یه‌ و شانازیشی پێوه‌ ده‌که‌ین.

له‌م ڕێوه‌ ڕه‌سمه‌ نووسه‌ری ناسراوی کورد، عه‌تا نه‌هایی، سه‌باره‌ت به‌ کامبیز که‌ریمی وتی: به‌ر له‌وه‌ی بچمه‌ سه‌ر ناوه‌ڕۆک و ستایلی شێعری کامبیز که‌ریمی باشتر وایه‌ باسی شێعر نوێی کوردی له‌ ئێران بکه‌ین که‌ هه‌مووی ۵۰ ساڵ ته‌مه‌نی هه‌یه‌. نه‌وه‌ی به‌ر له‌ کاک کامبیز شێعره‌کانیان سیاسی، ئایدۆلۆژیک و کۆمه‌ڵایتی بوون.

ئه‌و زیادی کرد: سه‌رده‌مێک که‌ شاعران زمانی کۆمه‌ڵگای خۆیان بوون. ئه‌م ڕه‌وته‌ تاکوو سه‌رده‌می شاعری وه‌ک جه‌لال مه‌له‌کشاش درێژه‌ی هه‌بوو که‌ لاوی ئه‌وان هاوکات بوو له‌گه‌ڵ گۆڕانکاریی و شۆڕش له‌ ئێران.

ئه‌م نووسه‌ره‌ کورده‌ ڕایگەیاند: به‌ڵام له‌ ساڵه‌کانی ۷۰ی هه‌تاوی به‌ملاوه‌ نه‌وه‌یه‌ک دێته‌ گۆڕه‌پانه‌که‌ که‌ ئه‌زمونی خۆی له‌ ژیان دێنێته‌ ناو شێعری هاوچه‌رخی کوردی که‌ کامبیز که‌ریمی یه‌کێکه‌ له‌ که‌سه‌ ناسراو و به‌هێزه‌کانی ئه‌م نه‌وه‌یه‌، ئه‌و ئه‌گه‌رچی به‌ زمانی سۆرانی حیماسی کراو ده‌نووسێت به‌ڵام چوارچێوه‌ باوه‌کان ده‌شکێنێت و له‌ شه‌قامی سیروس، کۆڵانی سبورائاو و له‌ په‌نجه‌ره‌ی ماڵێکی بچووکی سنه‌وه‌ له‌ ژیان ده‌ڕوانێت و شێعر ده‌نووسێت.

ئه‌و له‌ درێژه‌دا وتی: گرنگی شێعری که‌ریمی له‌وه‌ دایه‌ که‌ نیگا و بۆچوونی خۆیی به‌ شێعر نووسییه‌وه‌ هه‌ر به‌م هۆیه‌وه‌ شێعره‌کانی پڕه‌ له‌ ئازاره‌کانی لاوێکی کورد. شێعره‌کانی ئه‌م شاعره‌ ۳ تایبه‌تمه‌ندی هه‌یه‌ یه‌که‌م خۆشه‌ویستی، دووهه‌م سه‌فه‌ر و سێهه‌م مه‌رگ. ئه‌م سێ تایبه‌تمه‌ندییه‌ له‌ شێعره‌کانی کاک کامبیز به‌ جوانی خۆیان ده‌نوێنن و شاعر به‌ توان و هزرێکی باش و ورد توانیه‌تی باسیان بکات.

له‌ درێژه‌ی ئه‌م به‌رنامه‌ ئۆمێد وه‌رزه‌نده‌، سه‌رۆکی ناوه‌ندی کوردستان ناسی زانکۆ ئازادی سنه‌ وتی: لانی که‌م ۱۰۰ ساڵ به‌ر له‌ ئێستا له‌ ئه‌ورووپا ڕه‌وتی تۆمار کردنی شێعر به‌ ده‌نگی خودی شاعران باو بووه و پێشوازی زۆر باش له‌م کاره‌ش کرا. دواجار له‌ ئێران که‌سانی وه‌ک ئه‌حمه‌د شاملو ئه‌م کاره‌یان ئه‌نجام دا له‌ هه‌رێمی کوردستانیش دیاره‌ که‌ شێرکۆ بێ که‌س به‌ باشی له‌م توان و ده‌رفه‌ته‌ سوودی برد. لێره‌ش کامبیز که‌ریمی له‌م سی دییه‌دا به‌ جوانی له‌م ده‌رفه‌ته‌ سوودی بردووه‌ و شێعره‌کانی به‌ هاوڕێی مۆسیقای شارام عه‌لی موحه‌مه‌دی به‌ باشی خوێندووه‌.

ئه‌و زیادی کرد: سه‌باره‌ت به‌ تایبه‌تمه‌ندییه‌کانی شێعره‌کانی کاک کامبیز هاوڕێیان قسه‌ی زۆریان کرد، به‌ڵام دوو خاڵ هه‌یه‌ که‌ من ده‌مه‌وێت ئاماژه‌ی پێ بکه‌م، یه‌که‌م بوێری که‌ریمی له‌ سوود بردن له‌ بن زاراوه‌ی ئه‌رده‌ڵانییه‌ له‌ شێعره‌کانی، تاکوو به‌ر له‌مه‌ که‌س له‌ زمانی کوردی سۆرانی به‌لای ئه‌م شتانه‌دا نه‌ده‌ڕۆیشت و به‌ جۆرێک قه‌ده‌غه‌ بوو، به‌ڵام که‌ریمی هاوکات هه‌م ڕێزمانی کوردی به‌ باشی ده‌زانی هه‌م له‌م توانه‌ زمانییه‌ی خودی زمانی کوردی به‌ باشی سوودی بردووه‌ له‌ شێعره‌کانی.

ئه‌م مامۆستایه‌ی زانکۆ وتی: تایبه‌تمه‌ندی دیکه‌ی شعێره‌کانی کاک کامبیز گه‌مه‌ کردنی شاعر به‌ پاڕادۆکسی مه‌رگ و ژیانه‌. ئه‌و له‌ شێعره‌کانی ئاماژه‌ مردن و نه‌بوونی له‌ زۆر شتدا ده‌کات به‌ڵام هاکات خوڕه‌ی ژیان له‌ شێعره‌کانیدا بوونی هه‌یه‌، له‌ ڕاستیدا ئه‌و به‌ باشی باسی ئازار و مه‌ینه‌تییه‌کانی ژیان ده‌کات، به‌ڵام هاوکات هه‌ستیارانه‌ ئاگاداره‌ که‌ بۆ درێژه‌دان به‌م ڕه‌وته‌ پێویستی به‌ هه‌نگاو هه‌لگرتن و گه‌رمای ژیان هه‌یه‌.

شایانی باسه‌ که‌ له‌ کۆتایی ڕێوڕه‌سمه‌که‌ له‌ سی دی ئێواره‌ی مناڵی ڕوونوێنی کرا.

News Code 21403

نیشانەکان

بۆچوونی ئێوە

You are replying to: .
  • 2 + 2 =