شێعر به‌شێکی گه‌وره‌ی کۆڵه‌که‌ی پاراستنی شوناسی کورد

"شاعێری ئێواره‌ی مناڵی جه‌خت له‌وه‌ ده‌کات که‌ پێویسته‌ شێعر وه‌ک به‌شێکی گه‌وره‌ی کۆڵه‌که‌ی پاراستنی شوناسی کورد لە سەر شەقامەکان و لە نێو کۆڵان و گه‌ڕه‌که‌کان هاوار بکەین."

ئاژانسی هه‌واڵی مێهر- به‌شی فه‌رهه‌نگ و هونه‌ری کوردی؛ حه‌لیمه‌ موڵایی: کامبیز که‌ریمی، شاعێر و نووسه‌ری ناسراوه‌ی کورد ساڵی ۱۳۴۷ له‌ شاری سنه‌ له‌ دایک بووه‌. دواتر خوێندنی باڵای له‌ بواری "مێژوو" له‌ زانکۆی هه‌مه‌دان ته‌واو کردووه‌. ساڵی ۱۳۶۵ده‌ستی کردووه‌ته‌ چالاکی ئه‌ده‌بی و ڕۆژنامه‌وانی و تا ئێستاش به‌رده‌وامه‌ له‌م چالاکییانه‌ و له‌گه‌ڵ زۆربه‌ی گۆڤار و چاپه‌مه‌نییه‌کانی ‌کوردستان هاوکاری هه‌یه‌.

کامبیز که‌ریمی ماوه‌یه‌ک ئه‌ندامی ده‌سته‌ی نووسه‌رانی ڕۆژنامه‌ی ئاشتی و هه‌روه‌ها سه‌رنووسه‌ری حه‌وته‌نامه‌ی سیروان بووه‌.

سه‌ره‌کی ترین به‌رهه‌مه‌کانی کامبیز که‌ریمی بریتین له‌؛" آخرین ثانیه‌‌‌‌هاى عمر یک گنجشک" "در چهارگوشه تنگ تنهایى"، "چهارده رییس جمهور شعر"، دیازپورا، ڕوانگه‌ی رۆژهەڵاتناسان له‌باره‌ی مێژووی کورد و کوردستان، "تبعید ۱۸۲ هزار رؤیا".

بەبۆنەی ڕوونوێنی لە ئەلبومی ئێوارەی مناڵی لە کاتی بەڕێوەچوونی ئەم کوڕەدا کە دوایین بەرهەمی ئەم شاعیرەیە چەند پرسیارێکمان ئاراستەی کرد کە دەقی پرسیارەکان و وڵامەکانی بەڕێزیان بەم شێوەیە:

زانیاری وردترمان له‌سه‌ر ئه‌لبۆمی ئێواره‌ی مناڵی پێبده‌ن

ئه‌م ئه‌لبۆمه‌ ۱۵ شێعری تێدایه‌ کە له‌ لایه‌ن دوکتور ئۆمێد وه‌رزه‌نده‌وه‌ گوڵبژێر کراوه‌ و مامۆستا هادی زیائه‌دینی نیگارکێشی کردووه‌، هونه‌رمه‌ند شارام عه‌لی موحه‌مه‌دی مۆسیقای تایبه‌تی بۆ داناوه‌ و کاک فه‌رهاد مورادوه‌یسی به‌ڕێوه‌به‌ریی پڕۆژه‌ هونه‌رییه‌که‌ی له‌ ئه‌ستۆ بووه و حه‌وزه‌ی هونه‌ری کوردستانیش سه‌رمایه‌دانه‌ری له‌سه‌ر ئه‌م به‌رهه‌مه‌ کردووه‌.

 بۆچی ناوی ئه‌م ئه‌لبۆمه‌تان ناوه‌ ئێواره‌ی مناڵی؟

(پێده‌که‌نێت)نازانم،رەنگە کەم کەم خەریکم هەست بە گەورەبوون دەکەم و هەر ئەمڕو یان بەیانی دەگەمە ئێوارەی مناڵیم. ئەڵبەت  "ئێواره‌ی مناڵی" ئیشارەت بە ناوەرۆکی یەکێ لە شێعرەکانیشە.

 ژانری شێعری ئه‌م به‌رهه‌مه‌ زیاتر چییه‌؟

هه‌مووی عاشقانه‌یه‌، به‌ڵام نه‌ک ئه‌و عه‌شقه‌ی وا خێرا دێته‌ زه‌ینی هه‌موو که‌سێک، عه‌شق هه‌میشه‌ به‌ مانای خۆشه‌ویستی نێوان دوو ڕه‌گه‌زی جیاواز نییه‌.ناڵێم شێعری دڵدارانه‌ی تێدا نییه‌ به‌ڵام هه‌مووی دڵداری نییه‌.عه‌شق ده‌توانێ خاڵی پێکانی هه‌موو شتێکی ئه‌م جیهانه‌ بێت، بۆ وێنه‌، ئێواره‌ی مناڵی شێعری تێدایه‌ که‌ له‌وپه‌ڕی خۆشه‌ویستیه‌وه‌ بۆ گه‌ڕه‌کی شوێنی له‌ دایک بوونم و سه‌رده‌می منداڵی خۆمم وتووه‌. یان بۆ خۆش ویستنی چۆلەکەیەک.

بۆچی هه‌ستتان به‌و پێویستییه‌ کرد ده‌بێ شێعره‌کانتان بکه‌نه‌ سی دی؟ له‌ حاڵێکدا که‌ هه‌ندێ شێعریشی تێدایه‌ که‌ پێشتر بڵاوتان کردووه‌ته‌وه‌ و خه‌ڵک بینیویانه‌.

شێعر به‌شێکی گه‌وره‌ی کۆڵه‌که‌ی پاراستنی شوناسی کورد بووه‌.من و تۆ باش دەزانین ئەم کۆڵه‌که‌ ماوەیەکە خەریکە فەرامۆش دەکرێ ، فەرامۆش کردن لە لایه‌ن خەڵکی سەرشەقامەوە. پێویستە بە هەرشێوەیەک بۆمان دەکرێ جارێکی دیکه‌ شێعر لە سەر شەقامەکان و لە نێو کۆڵان و گه‌ڕه‌که‌کان هاوار بکەین. ئەگەر بە سی دی کرا  باشتر ئەگینا من دەڕۆمە سەیرانگاکان یان  بەردەم قۆتابخانەکان و رستۆرانتەکان و شێعر دەخۆێنمەوە تا گەلەکەم بزانن هێشتا شێعر کۆڵه‌که‌یکە کە دەتوانن خەمەکان ، عەشقەکەکان و هەوراز و نەشێوەکانی ژیانیان بلکێنن پێوە.  

هه‌روا که‌ خۆتانیش باش ده‌زانن ئابووری هونه‌ر و گه‌شه‌ی فه‌رهه‌نگی کوردستان زۆر لاواز ، وه‌ک هونه‌رمه‌ندێک که‌ چه‌ندین ساڵ ئه‌زموونی ئه‌م بواره‌تان هه‌یه‌ و هه‌ستتان به‌ کێشه‌کان کردووه‌، پێشنیارتان بۆ ژیاندنه‌وه‌ی ئابووری هونه‌ر چییه‌؟

کوردستان ده‌فرایه‌تی و پۆتانسیه‌لی زۆر گه‌وره‌ و باشی هه‌یه‌ بۆ خولقاندنی به‌رهه‌می هونه‌ری و فه‌رهه‌نگی و ته‌نانه‌ت هه‌نارده‌ کردنی ئه‌م به‌رهه‌مانه‌ش بۆ ده‌ره‌وه‌ی سنووره‌کانی وڵات، له‌ هه‌موو بواره‌کانی وه‌ک شانۆ، مۆسیقا، ئه‌ده‌بیات،.....به‌ڵام ئه‌م کاره‌ به‌ بێ نه‌خشه‌ڕێگایه‌کی تایبه‌ت و کارناسانه‌ ناکرێت. ده‌بێ به‌رپرسان و به‌ڕێوه‌به‌رانی بواره‌کانی هونه‌ر و فه‌رهه‌نگی کوردستان به‌ هه‌ستیاریه‌وه‌ بڕواننه‌ ئه‌م سه‌روه‌ته‌ گه‌وره‌یه‌ و به‌ سینگ فراوانی ده‌ست بده‌نه‌ گه‌شه‌ی ژێرخانه‌ فه‌رهه‌نگییه‌کان. ئه‌ڵبه‌ت چونکوو گه‌شه‌ی فه‌رهه‌نگی ، گه‌شه‌کردنێکی هاوسه‌نگ و هاوپه‌یوه‌نده‌ به‌ گه‌شه‌ی سیاسی، ئابووری و کۆمه‌ڵایه‌تی‌، بواره‌کانی دیکه‌ش ده‌بێ بگه‌شێننه‌وه‌ تاکوو کوردستان سوود له‌ ئابووری هونه‌ر ببات.

News Code 21401

نیشانەکان

بۆچوونی ئێوە

You are replying to: .
  • 1 + 5 =