ئازاد کردنی عه‌فرین تەوەرێکی دانوستان کورد له‌گه‌ڵ دیمەشقە

ئه‌ندامێکی ئه‌نجومه‌نی باڵای سووریای دیموکرات وتی: ئازاد کردنی عه‌فرین به‌شێکی گرنگ له‌ دانوستانه‌کان له‌گه‌ڵ دیمەشقە.

به‌ ڕاپۆرتی ئاژانسی مێهر له‌ ڕۆیترز، محه‌مه‌د حه‌سه‌ن عه‌لی، ئه‌ندامی ئه‌نجومه‌نی باڵای سووریای دیموکرات سه‌باره‌ت به‌ ڕاده‌ست کردنی هه‌ندێک ناوچه‌ی باکووری سووریا به‌ ده‌وڵه‌تی ناوه‌ندی وتی: شتی وا ڕه‌تده‌که‌ینه‌وه‌. هه‌ندێک که‌س ده‌یانه‌وێت ڕای گشتی به‌لاڕێدا ببه‌ن، به‌ڵام هیچ ڕێککه‌وتنێک له‌ سه‌ر کۆنتڕۆڵ‌ کردنی ناوچه‌ ئازاد کراوه‌کان ئه‌نجام نادرێت. 

ئه‌و زیادی کرد: ئێمه‌ هه‌میشه‌ جه‌ختمان له‌سه‌ر ڕێکاری گفتوگۆی نێوخۆیی بۆ چاره‌سه‌ر کردنی قه‌یرانی سووریا کردووه‌. له‌وه‌ته‌ی به‌شار ئه‌سه‌د و ڤیلادیمیر پووتین سه‌رۆک کۆماری ڕووسیا ئاماده‌یی خۆیان بۆ گفتوگۆ له‌گه‌ڵ هێزی سووریای دیموکرات ده‌ربڕیوه‌، هه‌ر دوو لا سه‌باره‌ت به‌ پرسه‌ پێوه‌ندیداره‌کان به‌ خزمه‌تگوزاری گشتی له‌ ناوچه‌ ئازاد کراوه‌کان و ڕێکخستنی وێزگه‌ی کاره‌بای به‌نداوی ته‌بقا که‌ پێداویستییه‌کی خه‌ڵکه‌ گفتوگۆیان کردووه‌.

ئه‌م به‌رپرسه‌ کورده‌ ئاماژه‌ی دا: ده‌وڵه‌تی ناوه‌ندیی سووریاش هه‌ندێک یاسای تایبه‌ت به‌ فه‌رمانگه‌ خۆجێییه‌کانی سووریای پێشنیار کردووه‌ و بڕیاری داوه‌ تا ئه‌و کاته‌ی له‌ ڕووی کردارییه‌وه‌ به‌ ڕێکارێک ده‌گه‌ن گفتوگۆ دوو لایه‌نه‌کان درێژه‌ی هه‌بێت. دوو لایه‌ن لیژنه‌یه‌کی هاوبه‌شیان بۆ به‌دوادا چوونی کاروباری به‌نداوی ته‌بقا و خزمه‌تگوزاری گشتی و ته‌ندروستی پێکهێناوه‌ که‌ هێشتا سه‌رقاڵی گفتوگۆن.

حه‌سه‌ن عه‌لی له‌ کۆتایدا سه‌باره‌ت به‌ عه‌فرین وتی: هه‌ر دوو لا هێزه‌کانی تورکیا به‌ هێزێکی داگیرکار ده‌زانن و له‌ داهاتووی ناوچه‌کانی سووریادا هیچ پێگه‌یه‌ک بۆ تورکیا دانانن. ئازاد کردنی عه‌فرینیش به‌شێکی گرنگ له‌ دانوستانه‌کان له‌گه‌ڵ دیمەشقە.

News Code 20996

نیشانەکان

بۆچوونی ئێوە

You are replying to: .
  • 5 + 11 =