هونه‌رمه‌ندێکی ناسراوی ئێران:

قوتبه‌دین سادقی یه‌که‌مین مه‌رجه‌عی شانۆی ئێرانه‌

ناسەی هەواڵ: 4298972 -
به‌رپرسی ماڵی شانۆی ئێران به‌ ئاماده‌ بوون له‌ ڕێوڕه‌سمی ڕێز گرتن له‌ دوکتور قوتبه‌دین سادقی جه‌ختی کرد: گومانی تێدا نییه‌ که‌ قوتبه‌دین سادقی یه‌که‌مین مه‌رجه‌عی شانۆی ئێرانه‌.

به‌ ڕاپۆرتی ئاژانسی مێهر، دوێنێ ئێواره‌ له‌ شاری سنه‌ و زانکۆ کوردستان کۆڕێکی ڕێز گرتن له‌ ته‌مه‌نێک کاری هونه‌ری بۆ دوکتور قوتبه‌دین سادقی ، هونەرمەندی ناسراوەی بواری سینەما و شانۆ گیرا.

ئه‌سغه‌ر هێمه‌ت، به‌رپرسی ماڵی شانۆی ئێران به‌ ئاماده‌ بوون له‌م ڕێوڕه‌سمه‌ وتی: زۆر خۆشحاڵم که‌ ئه‌مڕۆ له‌ نێو خه‌ڵکی شاری سنه‌م و ڕێز له‌م هونه‌رمه‌نده‌ گه‌وره‌یه‌ی ئێران و کوردستان ده‌گرین. قسه‌ کردن له‌ سه‌ر ئه‌م که‌سایه‌تییه‌ ئاسان نییه‌ که‌ چون ڕه‌هه‌ندی که‌سیاتی زۆر جۆراوجۆری هه‌یه‌ و ده‌بێت زۆر هۆشیار بین کاتێک باسی دوکتور قوتبه‌دین سادقی ده‌که‌ین.

ئه‌و زیادی کرد: من نزیک به‌ ۵۰ ساڵه‌ ئه‌م مامۆستا کورده‌ ده‌ناسم یه‌که‌م جار له‌ فستیڤاڵێک له‌ ڕامسه‌ر دیم که‌ لاوێکی باڵا به‌رز بوو هه‌ر به‌م جله‌ کوردیانه‌یه‌وه‌ هاتبووه‌ سه‌ر سێنی شانۆ بۆ نمایش کردن. 

ئه‌م هونه‌رمه‌نده‌ ئێرانییه‌ ئاماژه‌ی دا: دواتر له‌ زانکۆی هونه‌ره‌ جوانه‌کانی تاران له‌گه‌ڵی بووم، ئێمه‌ پێکه‌وه‌ پیر بووین و هه‌ر دووکمان هاوته‌مه‌نین و ڕاست له‌ ساڵێکدا له‌ دایک بووین، سادقی له‌ نێو زانکۆییه‌کان به‌ کتێبخانه‌ی گه‌ڕۆک ناسرا بوو، واتا کتێب نه‌بوو بێته‌ بازاڕ و دوکتور سادقی نه‌یخوێندبێته‌وه‌ ئه‌وه‌نده‌ گرنگی به‌ خوێندنه‌وه‌ و زانست له‌ کاری خۆیدا ده‌دا.

به‌رپرسی ماڵی شانۆی ئێران هه‌وره‌ها وتی: له‌ ڕووی زانستییه‌وه‌ دوکتور قتبه‌دین سادقی یه‌کێک بووه‌ له‌و که‌سانه‌ی زیاترین کاری زانستی له‌ سه‌ر شانۆی ئێران کردووه‌ و خزمه‌تی به‌م بواره‌ کردووه‌، واتا به‌ چوون بۆ فه‌ڕه‌نسا و گواستنه‌وه‌ی ئه‌زموونی هه‌نه‌ری شانۆی جیهانی توانی گۆڕانکاری ڕیشه‌یی له‌ شانۆگه‌ری ئێران ساز بکات. من هه‌میشه‌ جه‌ختم کردووه‌ دوکتور سادقی بێ گومان یه‌که‌مین مه‌رجه‌عی زانستی شانۆی ئێرانه‌.

ئه‌و له‌ کۆتایدا جه‌ختی کرد: من داوا له‌ هه‌موو به‌رپرسان ده‌که‌م که‌ که‌ڵک و سوود له‌ زانست و خوێنه‌واری ئه‌م که‌سایه‌تییه‌ به‌رزه‌ ببه‌ن چون به‌ڕاستی کاریگه‌ری باشی هه‌یه‌ و ده‌بێته‌ هۆی په‌ره‌ی فه‌رهه‌نگی زیاتری وڵاته‌که‌مان.

ناردنی بۆچوون

2 + 9 =