ڕاپۆرتی مێهر؛

یه‌کشه‌مه‌ی ڕه‌شی سه‌رده‌شت/کیمیابارانی ۸۰۲۵ کوردی بێ تاوان

ناسەی هەواڵ: 4015873 -
"ئێستاش که‌ ۳۰ ساڵ له‌ بوردومانی سه‌رده‌شت تێده‌په‌ڕێت به‌ڵام زۆر که‌س له‌ به‌رکه‌وتووانی ئه‌و چه‌که‌ پیسه‌ هێشتا ده‌رد و ڕه‌نجیان هه‌یه‌ و ئێش و ئازار به‌رۆکیان به‌رنادات و ژیانیان به‌ سه‌ختی تێپه‌ڕ ئه‌بێت."

کاتژمێر ۴ و نیوی ئێواره‌ی یه‌کشه‌مه‌ ۷ی پووشپه‌ڕی ساڵی ۱۳۶۶ی هه‌تاوی چه‌ند فڕۆکه‌ی به‌عسی شاری سه‌رده‌شتیان کرده‌ ئامانج و ۷ بۆمبی خه‌رده‌لیان به‌ سه‌ری خه‌ڵکی بێ تاوانی ئه‌م شاره‌دا ڕژاند. دوو بۆمب له‌ ناوه‌ڕاستی بازاڕی شار که‌وته‌ خواره‌وه‌ و ۲ بۆمبیش له‌ ماڵی خه‌ڵکی دا و ۳ بۆمب که‌وته‌ باخ و مه‌زرای ده‌ڤه‌ری شار.

هه‌رواڵده‌ریی مێهر، یه‌کشه‌مه‌ی ڕه‌شی سه‌رده‌شت وه‌ک په‌ڵه‌یه‌کی هه‌رگیز نه‌سڕاوه‌ به‌ ناوچاوی چه‌وسێنه‌رانی جیهانه‌وه‌ مایه‌وه‌ و خه‌می شه‌هید و بریندار بوونی ۸۰۲۵ که‌سی له‌سه‌ر دڵی خه‌ڵکی ئێران و کوردی هه‌میشه‌ لێقه‌وما هێشته‌وه.

له‌و ڕۆژه‌ پڕنه‌هامه‌تیه‌دا که‌ له‌ ناکاو ڕژێمی به‌عس خه‌ڵکی بێ تاوانی شاری سه‌رده‌شتی له‌ پارێزگای ئازه‌ربایجانی ڕۆژاوا کرده‌ ئامانج خه‌ڵک خه‌ریکی ژیانی ئاسایی خۆیان بوون و چونکوو بازاڕ و ناو شار کرابوویه‌ ئامانج ژماره‌ی به‌رکه‌وتووان زۆر بوو، هه‌ر له‌ کاتژمێره‌ سه‌ره‌تاییه‌کانی دوای ئه‌و په‌لاماره‌ نامرۆڤانه‌‌ به‌رکه‌وتووان ڕوویان کرده‌ شاره‌کانی دیکه‌  بۆ چاره‌سه‌ری پزیشکی و میدیا کانی ئێران و جیهان ڕوویان له‌ سه‌رده‌شت کرد.

هه‌موو شتێک به‌ خه‌رده‌ل پیس کرابوو، ئاو، خاک، مه‌زرا، خواردن، مه‌ڕ و ماڵات و ... هتد. ئه‌مه‌ش دۆخه‌که‌ی زیاتر بۆ خه‌ڵک و به‌رپرسانی ئه‌و سه‌رده‌مه‌ ئاڵۆز کردبوو.

۸۰۲۵ که‌س له‌ ۱۲ هه‌زار که‌س دانیشتووی ئه‌و ساڵه‌ی سه‌رده‌شت به‌ر چه‌کی کیمیایی که‌وتن. نزیک به‌ ۱۵۰۰ که‌سیان باری ته‌ندروستیان زۆر ناله‌بار بوو و گواسترانه‌وه‌ بۆ نه‌خۆشخانه‌ی شاره‌کانی دیکه. ۱۳۰ که‌سیش شه‌هید بوون.

 ئێستاش که‌ ۳۰ ساڵ له‌ بوردومانی سه‌رده‌شت تێده‌په‌ڕێت به‌ڵام زۆر که‌س له‌ به‌رکه‌وتووانی ئه‌و چه‌که‌ پیسه‌ هێشتا ده‌رد و ڕه‌نجیان هه‌یه‌ وئێش و ئازار به‌رۆکیان به‌رنادات.

به‌ داخه‌وه‌ نه‌ له‌ کاتی ئه‌و هێرشه‌دا و نه‌ ئێستاشی پێوه‌ بێت، زۆر لایه‌ن گرینگی ئه‌وتۆیان به‌ کاره‌ساتی سه‌رده‌شت نه‌دا و سه‌رده‌شتی سه‌ربه‌رز که‌ نموونه‌یه‌که‌ له‌ قوربانی بوون، هێشتا ڕۆژی له‌ ڕۆژمێردا بۆ ته‌رخان نه‌دراوه‌ که‌ له‌ بیری به‌ره‌ی داهاتوو نه‌چێت و بێ به‌شه‌ له‌ زۆر خزمه‌تگوازی و ته‌نانه‌ت نه‌خۆشخانه‌ی پێشکه‌وتووی تایبه‌ت به‌ نه‌خۆشی به‌رکه‌وتووی چه‌کی کیمیایی نییه‌ و خه‌ڵکی سنوورپارێز و به‌غیره‌تی ئه‌م شاره‌ گیرووده‌ی ده‌ستی بێکاری و نه‌بوونی ژێرخانه‌ی باش و شیاو بۆ گه‌شه‌سه‌ندنی شار و ناوچه‌که‌یانن.

ناردنی بۆچوون

1 + 7 =