کاردانه‌وه‌ی هێرشه‌ مووشه‌کییه‌کانی ئێران له‌ مێدیاکانی هه‌رێم

ناسەی هەواڵ: 4008596 -
دوێنێ شه‌و سوپای پاسدارانی ئێران هێرشی مووشه‌کی کرده‌ سه‌ر داعش له‌ ده‌یره‌زوور و ئه‌مه‌ش له‌ مێدیاکانی جیهان کاردانه‌وه‌ی زۆری هه‌بووه‌.

به‌ ڕاپۆرتی ئاژانسی مێهر، دوێنێ شه‌و سوپای پاسدارانی ئێران به‌ ۶ مووشه‌کی باڵستیک هێرشی کرده‌ سه‌ر تیرۆریسته‌کانی داعش له‌ ده‌یره‌زوور.

ئه‌م هه‌واڵه‌ له‌ لایه‌ن مێدیاکانی هه‌رێمی کوردستانیشه‌وه‌ به‌ به‌رفراوانی ئاوڕی لێدرایه‌وه‌. باس نیوز سه‌باره‌ت به‌م هێرشانه‌ نووسی: سوپای پاسداران بۆ یه‌که‌مین جار  و ڕاسته‌وخۆ بنکه‌ و باره‌گاکانی داعشی له‌ ده‌یره‌زووری سووریا بۆردمان کرد.

درێژه‌شی دا: ئه‌گه‌رچی پێشتر ئێران به‌ ناڕاسته‌وخۆ و له‌ ڕێگه‌ی هاوپه‌یمانه‌ ناوچه‌ییه‌کانی خۆیه‌وه‌ به‌ ده‌یان جار بنکه‌ و باره‌گاکانی داعش له‌ عێراق و سووریا کوتاوه‌.

هه‌روه‌ها ڕووداو له‌ زاری پەیوەندییە گشتییەکانی سوپای پاسدارانی ئێران رایگەیاند: ئێران هێرشێکی مووشەکی بۆ سەر بنکە و بارەگاکانی فەرماندەیی "تیرۆریستە توندئاژۆکان" لە دێرزووری سووریا ئەنجامداوە، ئەوەش لە تۆڵەی هێرشەکانی تاران. 

هه‌روه‌ها نووسیویه‌تی: رشتنی خوێنی پاکی رووداوەکانی ئەمدواییەی تاران بێ وەڵام نابێت، کەمێک پێش ئێستا بنکە و بارەگا و شوێنی دروست کردنی ئۆتۆمبێلی بۆمب ڕێژکراوی تیرۆریستە تووندئاژۆکانی لە ناوچەی دێرزوور لە رۆژهەڵاتی سووریا کراونەتە ئامانجی مووشەکەکانمان. 
  
ماڵپه‌ڕی خه‌ندانیش به‌ گێڕانه‌وه‌ له‌ ئاژانسی مێهر ڕایگه‌یاند: هێزەكانی پاسەوانی شۆڕشی ئێران(پاسداران) لەبەیاننامەیەكدا ئاماژه‌یان داوه‌ ۶ موشەكی زەمین بە زەمینیان  ئاراستەی بنكەی سەركردایەتی داعش لە ناوچەی دێرزور لە سووریا كردووە بە مەبەستی تۆڵە كردنەوە لە ئەنجامدەرانی دوو كردەوە تیرۆریستیەكەی ئەم دواییەی تاران.

ئاماژە بەوەكراوە كە هێزەكانی پاسداران، بە مووشەک سەركردایەتی و بنكەی كۆبوونەوە و پشتیوانی و بەشی بۆمب رێژكردنی ئۆتۆمبیلەكانی داعشیان لە ناوچەی دێرەزور لە خۆرهەڵاتی سووریا كردووەتە ئامانج  به‌ مه‌به‌ستی تۆڵە كردنەوەی پەلامارە تیرۆریستییەكەی ئێران.



هه‌روه‌ها خه‌ندان ئاماژەی بەوەش کردووه‌ كە  موشەكەكان لە جۆری زەمین بەزەمین بوون لە بنكەی موشەكی هێزەكانی پاسەوانی شۆرشی ئێران لە پارێزگای كرماشان و کوردستان لە خۆرئاوای ئێرانەوە ئاراستەی بنكەی تیرۆریستان لە سووریا كراوە .

 وەک له‌ هه‌واڵه‌که‌دا هاتووه‌: بە هۆی ئەو هێرشەوە ژمارەیەكی زۆر تیرۆرستانی داعش كوژراوون و زیانی مادی گەورەش بە كەرەستە و جبەخانەكانیان گەیشتووه‌.

ئاژانسی هه‌واڵده‌ریی شارپرێس له‌مباره‌وه‌ نووسی:  وەزارەتی ئیتلاعاتی ئێران ئاشكرای كرد بنەكە و مۆڵگەكانی داعشیان لە شاری درێرەزووری سوریا بۆردومان كردووە.

هەروەها ئاماژه‌ بەوەش كراوە لەو بۆردومانەدا چەندین چەكداری داعشیان كوشتووە، بەڵام ئاماژە بە زیانەكان نەكردووە كە بەهۆی هێرشەكەوە كەوتووەتەوە.

شارپرێس جه‌ختی کردووه‌: ئەم یەكەم هێرشی موشەكی ئێران بۆ سەر سووریا لەناو خاكی خۆیه‌تی، چونكە ئەو هێرشە لە شاری كرماشانەوە ئەنجام دراون.

شایانی باسه‌ که‌ ۱۷ی جۆزه‌ردان، دوو هێرشی تیرۆریستی یەک لە دوای یەک كرایە سەر پەرلەمانی ئێران و مەزارگەی ئیمام خومەینی (ره‌) لە تارانی پایتەخت و بەهۆیەوە لانی که‌م ۱۸ كەس شه‌هید بوون و نزیكەی ۵۰ هاوڵاتی دیكە بریندار بوون، دوای رووداوەكەش داعش بەرپرسیاریه‌تی خۆی لە هێرشەكە راگەیاند.

ناردنی بۆچوون

4 + 7 =