دوای هێرشەکانی تاران:

پەیامی هۆگریی تاران بۆ پاوە

ناسەی هەواڵ: 4007156 -
به‌ به‌شداری ده‌یان که‌سایه‌تی شاری پاوه‌ و تاران پایته‌ختی ئێران ڕێوڕه‌سمێک بۆ دیدار لەگەڵ مامۆستا قادر قادری به‌ڕێوه‌ چوو.

به‌ ڕاپۆرتی ئاژانسی مێهر، دوای ڕوودانی چه‌ند کرده‌وه‌یه‌کی تیرۆریستی له‌ شاری تاران زۆر که‌س له‌ دوای ئه‌وه‌ بوون که‌ ئه‌م بابه‌ته‌ بکه‌نه‌ هه‌وێنێک بۆ ئاژاوه‌ی مه‌زهه‌بی و ئێتنیکی له‌ ئێران.

له‌ هه‌مان سه‌ره‌تای ڕووداوه‌ تیرۆریستییه‌که‌ مامۆستای هه‌ینی شاری پاوه‌، مامۆستا قادر قادری ئه‌م هێرشانه‌ی ئیدانه‌ کرد و داوای کرد که‌ خه‌ڵکی کورد و پاوه‌ نه‌بنه‌ به‌رتیلی تانه‌ و ته‌شه‌ر چون ئه‌وه‌ی بچێته‌ ناو داعش چی دیکه‌ کورد نییه‌ و ئه‌گه‌ر که‌سێکیش هه‌وڵ بدات داعش و کاره‌کانی ئه‌م گرووپه‌ تیرۆریستییه‌ به‌ سه‌ر کورد-دا ساخ بکاته‌وه‌ لێیخۆش نابن.

مامۆستا قادری هه‌روه‌ها جه‌ختی کرد بوو که‌ کورد به‌ درێژایی هه‌زاران ساڵه‌ له‌ ئێران ژیاوه‌ و ئێره‌ نییشمانی خودی کورده‌ و ده‌بێت هۆشمان بێت که‌ تیرۆریسته‌کانی داعش بۆ نانه‌وه‌ی ناکۆکی له‌ نێوان کورد و خه‌ڵکی ئێران ئه‌م کاره‌یان کردووه‌ و نابێت مۆڵه‌ت بده‌ین که‌ ئه‌م ڕووداوانه‌ ببێته‌ هۆی ناکۆکی و ئاژاوه‌ نانه‌وه‌.

هه‌ر به‌ هۆی لێدوانه‌ به‌جێکانی مامۆستا قادر قادری، دوێنێ ئێواره‌ تاقمێک له‌ که‌سایه‌تییه‌کانی کرماشان و شاری تاران سه‌ردانی مامۆستا قادریان کرد تاکوو له‌ نزیکه‌وه‌ به‌ کورد و ئه‌هلی سوننه‌ی ئێران ڕایبگه‌یه‌نن که‌ داعش سه‌ر به‌ هیچ نه‌ته‌وه‌ و مه‌زهه‌بێک نییه‌ و وه‌حشیگه‌ری داعش نابێت له‌ پای که‌سی دیکه‌ بنووسرێت و ده‌بێت هه‌وڵ بده‌ین به‌ یه‌کگرتوویی بمێنینه‌وه‌.

له‌م نێوانه‌دا له‌ شاری تارانه‌وه‌ که‌سایه‌تی وه‌ک دوکتور وه‌حید یامی پوور، ئیبراهیم ڕازینی و سه‌ید کومه‌یل باقرزاده‌ له‌م ڕێوڕه‌سمه‌دا به‌شداریان کرد بوو.

مامۆستا قادری هاوکات له‌گه‌ڵ سپاس له‌ سه‌ردانی که‌سایه‌تییه‌کانی ئێران له‌ شاری پاوه‌ له‌م کۆڕه‌دا وتی: خودای گه‌وره‌ له‌ قورئان ۷۰ جار له‌ سه‌رهه‌ڵدانی فیتنه‌ هۆشداری داوه‌. ده‌فه‌رمێت له‌ فیتنه‌ خۆتان به‌ دوور بگرن چون گه‌ر ئاگره‌که‌ی داوێنتان بگرێت ته‌ڕ و وشک پێکه‌وه‌ ده‌سووتێنێت.

ئه‌و زیادی کرد: له‌مڕۆدا له‌ جیهانی ئیسلام فیتنه‌ سه‌ری هه‌ڵداوه‌ و تیرۆریسته‌کانی داعش ده‌یانه‌وێت به‌ فیتنه‌ نانه‌وه‌ هه‌موو میله‌تانی ناوچه‌که‌ له‌ ئاگری ڕق و کینه‌ی خۆیان گرفتار بکه‌ن، هه‌ر بۆیه‌ ئێمه‌ ده‌بێت به‌ڕاستی هۆشیار بین.

له‌ درێژه‌دا دوکتور وه‌حید یامین پوور وتی: ئێمه‌ به‌ نوێنه‌ری خه‌ڵکی تارانه‌وه هاتووین تاکوو ئه‌م سه‌ردانه‌ بکه‌ین و ڕایبگه‌یه‌نین که‌ خه‌ڵکی تاران سڵامیان هه‌یه‌ بۆ ئه‌هلی سوننه‌ و خه‌ڵکی پاوه‌ و نه‌ته‌وه‌ی کورد، خه‌ڵکی کوردستان تاجی سه‌ر ئێمه‌ن و باشیش ده‌زانین خه‌ڵکی کوردستان به‌ درێژایی مێژوو چه‌ند له‌م نیشتمانه‌ به‌رگریان کردووه‌.

شایانی باسه‌ که‌ له‌ درێژه‌ی ئه‌م ڕێوه‌ڕه‌سمه‌ چه‌ندین که‌سایه‌تی دیکه‌ به‌شداریان کرد و ڕێز و سپاسی خۆیان به‌ خه‌ڵکی پاوه‌ و تێکۆشانه‌ ماندوونه‌ناسه‌کانی مامۆستا قادری پێشکه‌ش کرد.

ناردنی بۆچوون

4 + 14 =